Aurkezpena

Zer da "lokalizazioan oinarritutako zerbitzu" bat (LBS) eta zer eskaintzen digu?

Kokapen geografikoari buruzko informazioa ematen duten prestazioei esaten zaie "Lokalizazioan oinarritutako zerbitzu" (LBS).

Erantzunak prozesatu eta emateko, LBS aplikazioek teknologia ugari erabiltzen dituzte; esaterako, GPS teknologiak (Posizionamendu Globaleko Sistemak) eta GSM teknologiak (Komunikazio Mugikorretarako Sistema Globalak). Aplikazio horietako batzuen helburua da zerbitzu geografikoak denbora errealean ematea; esaterako, mapak erabiltzea, ibilbideak sortzea eta GPS teknologiaren bidez argazkien edo jokoen lokalizazioa bilatzea.

Gaur egun, teknologia berri horiek darabiltzate merkatuko telefono eramangarri batzuek, eta aukera berriak eskaintzen dizkiete erabiltzaileei.

LBS aplikazio ugari daude, eta, haien bidez, denbora errealean lan egin dezakegu ingurunean: proiektu edo ibilbide hezigarriak sor ditzakegu, altxorra bilatzeko jokoak antolatu, bisita gidatuak prestatu, etab. Aukera horien bidez, kanpoan jolasteko aukera eman diezaiekegu ikasleei, eta, batik bat, ikaskuntzaz gozatzekoa.

Proposamen honetan, ikusiko dugu hauek direla ingurunea aztertzeko iradokitzen diren lanetako batzuk: behatzea, ikertzea, aurkikuntzak egitea, datuak biltzea, eta hausnarketak eta analisiak egitea. Horien bidez, bizipen edo esperientzia hezitzaileak sor ditzakegu, gure ikasleak gogoz parte har dezaten beren jakintzaren eraikuntza-prozesuan.

Baliabide berriak dira, oso erabilgarriak eta aukera ugari ematen dituztenak. Beraz, haiek ezagutzera gonbidatzen zaitugu.