1. Ariketa: Planoa teselatzen duten poligonoak aztertzen

Ikasleekin lanean: Teselazioak eta prozeduren txostenak egitea (2 ordu)

Ikasleak jardueran murgiltzen hasteko, Interneten kontsultak egin daitezke mosaikoei eta teselatuei buruz, eta, bereziki, arte hispaniar-musulmanari buruz. Azken horretarako, web gune bat gomendatzen dizuegu.

Irakaslek azaldu ahal izango die ikasleei zer diren mosaikoak eta zer den planoak irudi erregularrekin estaltzea, tarterik utzi gabe eta irudiak elkarren gainean jarri gabe. Errealitatean aurki ditzakegun estaldura ohikoenak etxebizitza, horma eta sabaietan lauza, zeramika, lauza txiki, azulejo eta teilekin eginikoak direnez, ikasleek zenbait hausnarketa egingo dituzte eta kapitalizatuz joango dira. Interesgarria litzateke ikasleei ikusaraztea, planoa estaltzean edo lauzatzean (teselazioa), teknika, artea eta dekorazioa uztartzen ditugula.

Ikasleek aurrez zituzten ideiekin, mosaikoak egiten joango gara, eta, aldi berean, Google SketchUpeko tresna berriak erabiltzen ikasiko dugu.

Behin teselazioak egindakoan eta plano guztia estaltzeko zer poligono erregular erabil ditzakegun zehaztutakoan, irakasleak ikasle-talde guztiekin bateratze-lana egingo du.

Horren ondoren, testu-prozesadore batean txosten bat egiteko eskatuko die, eta egin dutena azaltzeko bertan. Horrek lengoaia geometrikoa zehaztasunez erabiliz adierazten lagunduko die ikasleei, bai eta norberaren eta gainerakoen arrazoiketak ulertzen eta kritikoki baloratzen ere.