1.1. Ariketa: poligonoak antzematen gure inguruan

Inguruan argazkiak ateratzea eta ordenagailuan deskargatzea (1h)

Gure herriko erdigunean edo inguruan barrena poligonoak harrapatzen hasi baino lehen, beharrezkoa izango da poligonoa zer den labur-labur gogoratzea, ikasleek garbi izan dezaten zer aurkitu behar duten. Kontzeptuak zer esan nahi duen azaltzeko, lehendabizi, lerro poligonala aztertuko dugu, gero definizioa eta haren elementuak aztertuko ditugu, eta azkenik, galdetuko diegu ezaugarri horiek betetzen dituzten zer poligono ezagutzen dituzten. Beharrezkoa dela irudituz gero, arbelean zenbait poligono adieraz daitezke eta horien ezaugarriak nabarmendu ere bai.

Ikasleak talde txikitan banatuko ditugu eta esango diegu poligonoak adierazita ikusten dituzten objektuak, eraikuntzen elementuak, altzariak eta abar aukeratzeko. Egokiena litzateke talde horietako bakoitzak argazki-kamera edo sakelako telefono kameraduna edukitzea, gerora egin beharreko lana aurreratzeko, hau da, argazkiak deskargatzea.

Ikasgelara bueltatu eta irudiak ordenagailuetan deskargatuko ditugu. Fitxategiari izena jartzerakoan, komeni da taldea identifikatuko duen izenburua jartzea.

Lortutako irudiak mozteko eta tamainaz txikitzeko zer egin behar den birpasatzeko, Arbel digital interaktiboa (ADI) edo proiektagailua eta ordenagailua erabil daiteke prozedura oso-osorik azaltzeko.