3. Mailako IKT KAPSULA - LANTEGIA
Webquest
IbilbideaAurkezpenaWebquestaren xedea eta adibideakLoredun landareak: ikasleentzako proposamenaSarreraZereginaProzesuaBaliabideakEbaluazioa eta ondorioakLoredun lanadareak: irakasleentzako prestakuntza proposamena1. Jarduera2. Jarduera3. Jarduera 4. Jarduera4. Jarduera4. Jarduera4. Jarduera5. JardueraIrakasleentzako baliabideak eta programakIkasgelako programazioaIkasgelako programazioaIkasgelako programazioaIkasgelako programazioa
1 de 23
0%
Aurkibidea
Kredituak
Kredituak
© Itinerarium 2011

ZUZENDARITZA: Narcís Vives

KOLABORATZAILEAK:

  • PRODUKZIO-ZUZENDARITZA: Antonio Cara
  • EDUKI-ZUZENDARITZA: Antonio Cara
  • ZUZENDARITZA TEKNIKOA: Maite Vílchez
  • EGILEA: Soledad Garzón
  • EUSKARARA ITZULPENA: Eskola 2.0
  • MAKETAZIOA: Miquel Gordillo eta Maite Vílchez

Ibilbidea

Zer egingo dugu?

Lantegi honetan, IKTen gelako aplikazio baten adibidea emango dugu, curriculum-edukiak ikasteko eta trebetasun digitalak eskuratzeko baliagarria dena. Oraingoan, Webquest baliabidea erabiliko dugu.

Zer urrats egingo ditugu?

Aurkezpena

Zer da Webquest bat eta zer eskaintzen digu?

Webquest (WQ) bat ikerketa gidatuko jarduera bat da, eta azken produktu bat egiten da amaieran. Ikerketa-lanerako erabiltzen diren informazio-iturri gehienak Internetetik datoz. Zereginak goi-mailako pentsamendu-trebetasunak erabiltzea eskatzen die ikasleei, adibidez, laburtzea, aztertzea, justifikatzea, arazoak konpontzea edota ideia originalak sortzea.

Webquest batekin erabiltzen den lan-metodologiak premisa hauei erantzuten die:

  1. Gida bat ematen da, eta bertan taldean egin beharreko zereginak eta irakasleak aurrez ezarritako web-baliabide batzuk zehazten dira. Zereginak banatzen dira, eta adierazitako rolak hartzen dira.
  2. Arazo edo erronka bat konpondu behar da; ahal izanez gero, jakin-mina piztu behar du, eta eztabaidagarria, misteriotsua eta erakargarria izan behar du. Erantzuna ez da zuzenean sarean aurkitzen, zenbait informazio-iturri erabilita eraiki behar da.
  3. Ikerketaren emaitzak zentzua duten material berriak egiteko erabili behar dira, adibidez, hauek egiteko: azalpen-liburuxka bat, iragarki bat eskolako web-orrirako, orri bat karteldegirako, albiste bat egunkari digitalerako, kronika bat blogerako.

Internetek eskaintzen dituen baliabideak ikasgelan erabiltzeko estrategia didaktiko eraginkor eta ospetsuenetako bat bihurtu dira WebQuestak. Haien aldakortasunari esker, Webquestak zenbait mailatako ikasleentzat diseina daitezke, edozein irakasgai-motatan, diziplina baten edo gehiagoren barruan.

Bernie Dodgek sortu zuen Webquest-eredua 1995ean, eta oso ospetsu egin da herrialde askotan. Ereduak izan duen arrakasta horren ondorioz, Interneteko hezkuntza-munduan presentzia handia izatea lortu du.

Webquest-ereduaren sortzaileari buruz
Bernie Dodge hezkuntza-teknologiako irakaslea da San Diegoko unibertsitatean, Kalifornian, Estatu Batuetan.
Haren Webquest.org gunean, ereduaren jatorria izan zen dokumentua dago: Some Thoughts About WebQuests (ingelesez).

Webquestaren xedea eta adibideak

Zertarako Webquest bat?

Webquesten diseinua pentsatuta dago:

  • ikasleek informazio bila ematen duten denbora eraginkortasunez erabil dadin sustatzeko, eta informazio horren erabilera eta trataera lantzeko.
  • irakaslearen proposamen didaktikoak antolatzeko eta orientatzeko.

Webquest baten helburu nagusia ez da Interneten ibiltzen irakastea, ez eta teknologia berriak erabiltzen irakastea ere (nahiz eta era horretako trebetasunak ere ikasten diren); helburua da historia, zientziak, matematika edota hizkuntzak ikastea, IKTek eskaintzen dizkiguten tresnak erabiliz, eta Webquest-ereduak ematen digun eraginkortasunarekin.

Adibidez:

Bazen behin... bakea

http://www.juntadeandalucia.es/averroes/sanwalabonso/wqyct/wq_cuentosdepaz/index.html

Bakearen eguna ospatzeko jarduerak

Lehen Hezkuntzako bigarren eta hirugarren zikloak

Urtarrilaren 30ean, Indarkeria Ezaren eta Bakearen Eskola Eguna ospatzen da.

Cervantes

http://www.juntadeandalucia.es/averroes/sanwalabonso/wqyct/wq_cervantes/portada.html

Gaztelaniaren arloko WebQuest bat Lehen Hezkuntzako hirugarren ziklorako.

Material honen helburua da adibideen bidez azaltzea nola aplika daitezkeen IKTak gelan, curriculum-edukiak ikasteko eta trebetasun digitalak eskuratzeko, Webquest baliabidea erabiliz.

Gure helburua IKT gaitasunak espezifikoki lantzea denez, proposamenean, ikaskuntza-helburuez eta metodologia-jarraibideez gain, bereziki zehaztu da zer gaitasun digital behar dituzten ikasleek nahiz irakasleek unitatea egiteko.

Horregatik, tutorial honen helburu nagusia da irakasleari jarraibideak eta laguntza ematea, Webquesten aukerak aprobetxatzen dituen ikasketa-sekuentzia bat prestatzerakoan eta aplikatzerakoan beharko dituen trebetasun instrumentalak, informazio digitalaren trataera eta komunikazio birtuala (IKT) ezagut eta landu ditzan.

Hortaz, premisa horiek kontuan hartuta, tutorialak honako hauek eskaintzen ditu:

  • Irakaslearen gida bat; gidak jarduera prestatzeko eta gauzatzeko lanak pausoz pauso adierazten ditu, eta alderdi didaktiko, teknologiko edota curriculum-alderdiei buruzko gomendio metodologikoak ere baditu. (Irakaslearen gida izeneko atala)
  • Irakaslearentzako prestakuntza-proposamen bat (Prestakuntza-proposamena izeneko koadroan dago laburbilduta).
  • Gelako programazio bat, curriculumari eta IKTei dagozkien helburu eta gaitasunekin (Gelako programazioa izeneko dokumentua).

Loredun landareak: ikasleentzako proposamena

Loredun landareak

Proposamen didaktiko honetan ikasleek zenbait IKT tresna erabiliko dituzte, landareen ezaugarriak ezagutzeko, batez ere loredun landareenak. Tresna horiekin, lankidetzan aritzeko zenbait jarduera elkarreragile eta sortzaile egingo dituzte ikasleek.

Proposamena da egutegi bat sortzea, urtaroak eta landareen bizi-zikloak lotu ahal izateko. Informazioa biltzerakoan, landareak ezagutzea eta ingurune naturalarekin nahiz giza ingurunearekin duten harremana ezagutzea sustatzen da. Proposamen didaktiko honen azken emaitza diseinua izango da; pertzepzio estetikoa, informazioa egiazkoa izatea eta IKT tresnak erabiltzea uztartuko dira diseinua egiteko.

Webquest guztiek bezala, 6 urrats ditu: sarrera, zeregina, prozesua, baliabideak, ebaluazioa eta ondorioa. Ikasleek lau fasetan egingo dituzte jarduerak:

  1. Kontsigna ulertzea, zeregina antolatzea eta rolak banatzea.
  2. Informazioa bilatzea eta aukeratzea.
  3. Egutegia diseinatzea.
  4. Egindako zereginari eta taldearen lanari buruzko ondorio hausnartua.

Sarrera

Loredun landareak: natura koloretan urtean zehar

Ongi etorri!

Badakizue guztiok landare-erreinua oso garrantzitsua dela gure planetako bizirako.

Pixka bat begiratuz gero, forma, tamaina eta kolore desberdinetako landare pila bat ikus ditzakegu. Euskadi horren adibide da; izan ere, 3.000 landare-espezie baino gehiago ditu, batzuk loredunak eta beste batzuk lorerik gabeak.

Jakingo duzue, halaber, izaki bizidunak direnez, jaio, hazi, ugaldu eta hil egiten direla. Baina, ba al dakizue nola egiten dituzten funtzio horiek landareek? Ikusi al duzue zenbat forma eta kolore dituzten haien loreek? ¿Zer urtarotan loratzen diren? ¿Nola aldatzen diren udazkenean?

Guk loredun landareak aztertuko ditugu. Landare horiekin, informazioz eta irudiz osatutako urteko egutegi bat diseinatuko duzue, zuentzat edo beste norbaiti oparitzeko.

Mundu zoragarri hori ezagutzera gonbidatzen zaituztegu!

Has dadila ikerketa!

Udaberri-loreak udaberrian lehendabizi loratzen diren loreak dira.

Iturria: http://upload.wikimedia.org/wikipedia/commons/c/c9/Primula_aka.jpg

Zeregina

Zeregin honetan urteko lore-egutegi bat aurkeztu behar da. Egutegi horretan, loredun landareei buruzko irudiak eta datu interesgarri edo bitxiak gehitu beharko dituzue. Baita landare horien ereingaraiak eta loraldiak noiz diren ere. Gainera, urtaroka antolatuta egon behar du (negua, udaberria, uda, udazkena).



Madrilgo Errege Lorategi Botanikoaren irudia

http://www.rjb.csic.es/jardinbotanico/jardin/index.php?Cab=5&len=es&Pag=127

Prozesua

Dagoeneko ikertzaile bihurtu zaretenez gero, ekin lanari!

  1. Lan-banaketa

Lehendabizi irakurri puntu guztiak, gero lanak banatu ahal izateko. Zuetako nor izango da argazkilaria? Eta ikertzailea? Nola aukeratuko duzue informazioa? Nork egingo du diseinu artistikoa? Eta azken diseinuaren aurkezpena? Beharrezkoa izaten da talde guztietan denboraz eta epeez arduratzen den kideren bat egotea, idazkari-lanak egiten dituena. Beraz, honako hauek behar dira:

  • argazkilariak: irudiak lortzeko
  • ikertzaileak: informazioa eta irudiak lortzeko
  • editoreak: informazio egokia aukeratzeko
  • arte-diseinatzaileak: egutegia pentsatzeko
  • bertsio digitalaren diseinatzaileak: ideia formatu egokira eramateko
  • idazkaria: egin beharreko lanak epeen barruan eta modu egokian egiten direla ziurtatzeko
  1. Ikerketa

Iker itzazue zuen inguruko loredun landareak. Hona hemen ikerketa gidatzeko balio dezaketen galdera batzuk: Zer izen du? Nolakoa da? Zer atal ditu? Nola ugaltzen da? Zer aldaketa izaten ditu urtaro bakoitzean? Noiz ereiten da eta noiz loratzen da? Zer behar du bizirik irauteko? Nola zaindu behar dira hiri-inguruneetan hazten direnean?

  1. Diseinua
  1. Ikertutako materialaren barruan, bilatu irudiak ere egutegia diseinatzeko. Egutegia hilabeteka edo bi hilabeteka antola daiteke. Urtaroak bereizi behar dira diseinuan. Loredun landareen argazki digitalak ere egin ditzakezue, edota sarean bila ditzakezue.
  2. Diseinua egiterakoan, kontuan hartu tarteak, irudien eta testuen arteko oreka, eta zenbakiak irakurgarriak izatea. Hori egiteko, Open Officeren Impress programa erabiliko duzue.

Diapositiba bakoitzak honako hauek izan behar ditu gutxienez ere: loredun landarearen irudi bat; izena; noiz loratzen den; ugaltzeko modua eta ereingaraia; non egoten den normalean; oinarrizko beharrak (eguzki asko, hezetasun handia, adibidez). Gogoan izan informazioaren eta irudiaren iturria aipatu behar dela beti.

Hemen tutorial bat duzue, Impress programarekin zeregina egin ahal izateko: guiaimpress_alumnado.pdf.

Baliabideak

Hona hemen Webquesta egiteko baliabideak.

* Web-helbide luzeetara errazago sartu ahal izateko, http://bit.ly URL-laburtzailea erabili da.

Egutegia diseinatzeko programa
Web-orriak
Animazioak

Ebaluazioa eta ondorioak

Ebaluazioa

Ebaluaziorako taula honetan aurki ditzakezue irakasleak zuen lana baloratzeko kontuan hartuko dituen ebaluazio-irizpideak: rubrica_evaluacion.pdf.

Puntuazio ona lortu nahi baduzue, hartu kontuan irizpide horiek!

Ondorioa

Edozein zereginen ondoren, interesgarria izaten da beti bidean geldialdi bat egitea eta egindako ibilbidea aztertzea. Hitz egin lehendabizi talde txikian, eta gero guztion artean:

  • Zer iruditu zaizue zuen lanaren azken emaitza? Zer egingo zenukete desberdin eta zer berdin hurrengo batean? Zer beste gairi buruz egin nahiko zenukete egutegi bat? Zer aholku emango zeniekete Webquest hau egin behar duten beste ikasle batzuei?
  • Zer ikasi duzue proposamen honekin? Zer aldaketa proposatuko zenituzkete etorkizuneko ikasleentzat?

Loredun lanadareak: irakasleentzako prestakuntza proposamena

1. jarduera
EGIN BEHARREKO LANAK
IKT BALIABIDEAK
IKT GAITASUNAK

1. jarduera: Webquestaren elementuak ezagutzea.

2. jarduera: Webquesta antolatzea.
  • Webquest

D1. Ikaskuntza-esperientziak diseinatzea, martxan jartzea eta ebaluatzea, ikasleak bere interesen, erritmoaren, ikasteko moduaren eta trebetasunen arabera lan egin dezan, jada eginda dauden IKT baliabideak erabiliz.

D4. Ikaskuntza-esperientziak diseinatzea, martxan jartzea eta ebaluatzea, IKT baliabideak erabiliz XXI. menderako trebetasunak sustatzeko ikasleengan; esaterako, lankidetza, talde-lana, pentsaera kritikoa, arazoak konpontzea, enpatia eta sormena.

D5. Identifikatzea eta ebaluatzea zer IKT baliabidek balio duten: diziplinaren edukiak ulertzeko eta garatzeko, zenbait komunikazio-modu erabiltzeko, informazioa baliozkotzat jotzeko balio duten metodoak erabiltzeko, jakintza sortzeko erabiltzen diren helburuak sakontzeko.

D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.

D9. Ikasleengan hausnarketa sustatzea, elkarlanerako IKT baliabideak erabiliz, kontzeptuak erakutsi eta argitzeko, estrategiak planifikatzeko, eta aurkeztutako arazoen konponbideak identifikatzeko eta ebaluatzeko aukera emango dutenak.

D14. Informazioa (batez ere web-informazioa) bilatu eta aztertzeko estrategiak modelatu eta sustatzen dituzten ikaskuntza-esperientziak diseinatu, gauzatu eta ebaluatzea.

2. jarduera
EGIN BEHARREKO LANAK
IKT BALIABIDEAK
IKT GAITASUNAK

3. jarduera: Beharrezko diren baliabideak bilatzea.

4. jarduera: Ikasleek erabiliko duten Impress programarekin ohitzea.

  • Google eta beste bilatzaile batzuk

  • OpenOfficeren Impress

G5. Testu-prozesamenduko oinarrizko eragiketak egitea (formatua, lerrokatzea, orrialdeak zenbakitzea, irudiak txertatzea, letra-tipoa eta tamaina aldatzea, eta dokumentuak artxibatu eta inprimatzea).

G7. Multimedia-edukiekin lotutako oinarrizko eragiketak egitea (formatua; irudi bat, soinua, testua edo bideoa txertatzea; webgune batetik irudi bat deskargatzea).

G8. Erraz erabiltzea Interneteko zerbitzuak (webak, posta elektronikoa, foroa, txata, mezularitza eta beste batzuk) informazioa bilatzeko, ikastetxearen barruan nahiz ikastetxetik kanpo ikaskideekin komunikatzeko, eta esperientziak partekatzeko.

D1. Ikaskuntza-esperientziak diseinatzea, martxan jartzea eta ebaluatzea, ikasleak bere interesen, erritmoaren, ikasteko moduaren eta trebetasunen arabera lan egin dezan, jada eginda dauden IKT baliabideak erabiliz.

D2. Ikasleei beren ikaskuntzaren protagonista izaten lagunduko dieten ikaskuntza-giroak sortzea, aukera izan dezaten beren esperientziak eta helburuak diseinatzeko eta beren lanak ebaluatzeko IKT baliabideak erabiliz.

D5. Identifikatzea eta ebaluatzea zer IKT baliabidek balio duten: diziplinaren edukiak ulertzeko eta garatzeko, zenbait komunikazio-modu erabiltzeko, informazioa baliozkotzat jotzeko balio duten metodoak erabiltzeko, jakintza sortzeko erabiltzen diren helburuak sakontzeko.

D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.

D9. Ikasleengan hausnarketa sustatzea, elkarlanerako IKT baliabideak erabiliz, kontzeptuak erakutsi eta argitzeko, estrategiak planifikatzeko, eta aurkeztutako arazoen konponbideak identifikatzeko eta ebaluatzeko aukera emango dutenak.

3. jarduera. Amaitutakoan
EGIN BEHARREKO LANAK
IKT BALIABIDEAK
IKT GAITASUNAK

5. jarduera: Webquesta martxan jartzea, eta hura garatzen eta ebazten laguntzea.

  • Webquest

  • OpenOfficeren Impress

D1. Ikaskuntza-esperientziak diseinatzea, martxan jartzea eta ebaluatzea, ikasleak bere interesen, erritmoaren, ikasteko moduaren eta trebetasunen arabera lan egin dezan, jada eginda dauden IKT baliabideak erabiliz.

D2. Ikasleei beren ikaskuntzaren protagonista izaten lagunduko dieten ikaskuntza-giroak sortzea, aukera izan dezaten beren esperientziak eta helburuak diseinatzeko eta beren jarduerak ebaluatzeko IKT baliabideak erabiliz.

D4. Ikaskuntza-esperientziak diseinatzea, martxan jartzea eta ebaluatzea, IKT baliabideak erabiliz XXI. menderako trebetasunak sustatzeko ikasleengan; esaterako, lankidetza, talde-lana, pentsaera kritikoa, arazoak konpontzea, enpatia eta sormena.

D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.

D10. Proposatutako helburuekiko irizpide argi eta zehatzak ezartzeko balio duten eta ikasleei beren aurrerapen-maila egiaztatzeko aukera ematen dieten IKT baliabideak jartzea ikasleen esku, beren lanak hobe ditzaten.

D14. Informazioa (batez ere web-informazioa) bilatu eta aztertzeko estrategiak modelatu eta sustatzen dituzten ikaskuntza-esperientziak diseinatu, gauzatu eta ebaluatzea.

C6. Webean egileak aitortzeko eta iturriak behar bezala aipatzeko informazioa erabiltzeari buruzko arauak ezagutzea, errespetatzea eta errespetaraztea.

* Item horiek irakasleentzako IKT prestakuntzaren “Eskola 2.0” proposamenekoak dira. Eranskin honetatik aterata daude: IKTko gaitasun-mapak.

1. Jarduera

Webquestaren elementuak ezagutzea

WebQuestaren elementuak

WebQuestaren atalak sekuentzia logiko bat osatzeko pentsatuta daude. Horregatik, garrantzitsua da elementu bakoitzak informazio egokia ematea eta bere funtzioa betetzea. Hartara, elementu guztiek multzo koherente bat osatuko dute, eta horrek jarduera osotasunean ulertzea erraztuko du, interesari eutsiko dio eta proposatutako helburuak lortzeko aukera emango du.

WebQuestek sei elementu izaten dituzte:

  1. Sarrera
  1. Zeregina
  1. Prozesua
  1. Baliabideak
  1. Ebaluazioa
  1. Ondorioa

  1. Lana aurkezten duen eta proiektuari buruzko informazioa ematen duen sarrera bat.

Lanaren ingurunea prestatzen duen testu labur bat da sarrera. Prozesu osoan zehar aurkituko denari buruzko oinarrizko informazioa ematen du.
Elementu honen oinarrian dagoen ideia motibatzea da. Horregatik, testuak loturak bilatu behar ditu ikasleen interesen eta proposatutako gai edo problemaren artean.


  1. Zeregin interesgarri bat, egiteko modukoa.

Zeregina WebQuestaren bihotza da. Bildutako informazioarekin lortu behar den emaitza azaltzen da bertan.
Osagai honen ideia nagusia egiazkotasuna da: helduen munduan gerta daitezkeen egoerak lantzen dira. Horretarako, hiru elementu daude:

  • Ikasleak rol baten sartzen dira (mugimendu politiko edo ekologiko baten alde edo aurka, pertsonaia literario edo artistiko baten aholkulari, epaile, detektibe, kazetari),
  • agertoki jakin batean (eguerdiko albistegia, auzitegi nagusi bat, herri-protesta bat, batzar bat, aholkularitza-eskaera bat, argitu beharreko misterio bat),
  • produktu edo ekitaldi jakin bat egiteko (iritzi-ohar bat egunkarian edo albistegian, txosten bat gomendioekin, auzitegiaren epai bat, arte-kritika bat, misterio bat argitzearen kronika bat, ibilbide bat, banatu beharreko liburuxka bat).

  1. Ikasleek zeregina egiteko jarraitu beharreko prozesuaren deskribapen bat

Prozesuak zeregina egiteko jarraitu beharreko urratsak deskribatzen ditu.
Jarraibide argiak egitea eskatzen du, ongi egituratuta eta ikasleen behar kognitiboetara egokituta.
Prozesua elkarlanean ebatzi behar da (rolak eta zereginak banatzen dira, helburu komun bat lortzeko).


  1. Zeregina egiteko behar den baliabide-multzo bat.

Baliabideak artikuluak, liburuetako edo aldizkarietako zatiak, web-orriak, datu-baseak eta abar izan daitezke. Garrantzitsuena da ikasleek eskuragarri izatea baliabide horiek, sarean nora ezean ibil ez daitezen.


  1. Ebaluazio-irizpide batzuk, ikasleek helburuak bete ote dituzten jakiteko

Atal honetan, haien lana nola ebaluatuko den azaltzen zaie ikasleei. Ebaluazio-taula bat erabiltzen bada, hemen azaltzen da, eta irizpide batzuk erabiltzen badira, berriz, zerrendatu egiten dira. Banaka edo taldeka ebaluatuko den argitzen da.
Informazio hori ikaslearentzat da, eta, beraz, hiztegi ulergarria erabili behar da idazterakoan.


  1. Ondorio bat, ikasi dena laburbiltzeko, eta ikasten jarraitzera bultzatzeko.

Ondorioak egindako esperientzia laburbiltzen du, eta hausnartzera bultzatzen du, ikasitakoa beste testuinguru batzuetara orokortu ahal izan dezaten ikasleek.

2. Jarduera

Webquesta antolatzea

  • WebQuestaren gaia erabakitzea, sustatu nahi diren curriculum-edukiekin bat etorriz, eta zer mailatarako izango den kontuan hartuta.

Adibide gisa aurkeztu dugun Webquestean, Ingurunearen ezagueraren arlokoak dira curriculum-helburuak, Loredun landareak gaikoak, eta Lehen Hezkuntzako 5. mailako ikasleentzat dira.

  • Zeregin-mota zehaztea

WebQuestaren zereginei buruzko artikulua (http://www.eduteka.org/Tema11.php) kontsultatu ondoren, saiatu pentsatzen zein izango den zehazki ikasleei eskatuko zaien emaitza: pertsonaia baten elkarrizketa, ekitaldi edo festa bati buruzko kazetari-kronika bat, bidaia baten ibilbidea, poster edo horma-irudi bat, irudi-album bat, konparazio-txosten bat...

Adibidean, egin beharreko produktua landare-egutegi bat izango da.

  • Sortuko den informazioaren eraldaketa zehaztea: ikasleek diseinatu egin beharko dute, erabaki, aurreikusi, epaitu, ebatzi...

Gogoan izan Webquestek goi-mailako pentsamendu-trebetasunak martxan jartzeko eskatzen dietela ikasleei.

Adibidean, zenbait landareren ereingarai eta loraldiari buruzko informazioa ikertu, hautatu eta diseinatu beharko dute.

  • Ikasleek izango dituzten rolak zehaztea

Adibideko Webquestean, honako lan hauek sartzen dira: ikerketa-lanak (kide guztiek egin beharrekoak), irudiak bilatzea edo argazki digitalak egitea, denborak eta epeak antolatzea, egutegiaren diseinu artistikoa egitea eta bertsio digitala inprimatzea edo egitea. Beraz, banakako edo taldeko zereginak bereiz ditzakegu:

  • Zereginak antolatzea, denborak planifikatzea (Idazkaria / kide bat)
  • Loredun landareen ezaugarriei buruzko informazioa bilatzea (ikertzailea / guztiak)
  • Loredun landareen argazkiak ateratzea (argazkilaria / kide bat edo gehiago)
  • Aurkeztu den kontsignako ezaugarriak betetzen dituzten loreak aukeratzea (agertzen diren hilabetean loratzea, edo hilabete horretan ereitea) urteko hilabete bakoitzerako (editorea / guztiak)
  • Aurkeztu den kontsignaren araberako diseinua egitea (hilabete bakoitzak garai horretan loratzen den lore bat edo hilabete horretan ereiten den lore bat izan behar du) (arte-diseinatzailea / kide bat edo gehiago)
  • Proposatutako landare-egutegiaren bertsio digitala egitea (diseinatzaile digitala / kide bat edo bi, edo elkarrekin egitea linean, segidan...)
  • Azken berrikuspena eta ondorioak (guztiak)
  • Lana epearen barruan eta baldintza egokietan ematen dela ziurtatzea (idazkaria)

Hor izango duzu dagoeneko gaiaren, zereginen eta prozesuaren ideia orokorra, bai eta ikasleengandik espero denaren ideia orokorra ere. Orain lotura egokiak bilatuko dituzu.

3. Jarduera

Beharrezko diren baliabideak bilatzea

Irakasleak aukeratuko du ikasleek zer webgune kontsultatuko dituzten kontsigna ebazteko.

Webgune baten fidagarritasuna ebaluatzea ez da beti erraza izaten; gure aukeraketaren bidez, gure irizpideak ere adieraziko dizkiegu ikasleei. Horregatik, garrantzitsua da irizpideak argi edukitzea, eta azaldu ahal izatea. Orain Interneteko hezkuntza-guneak eta -baliabideak ebaluatzeko baliagarri izan daitezkeen adierazle batzuk proposatuko dizkizuegu. Kasu bakoitzean, honako hauek aurkezten dira: adierazlearen deskribapen bat, zer helburu betetzen duen eta ebaluazioa orientatzeko galdera batzuk.

Hona hemen adierazleak:

  • autoritatea,
  • eguneratzea,
  • nabigagarritasuna,
  • antolaketa,
  • edukien aukeraketa,
  • irakurgarritasuna,
  • hartzailearentzat egokia izatea,

Autoritatea

Deskribapena

Autoritatea webgunearen arduradunak -pertsona bat, helburu jakin baterako bildu den pertsona-talde bat edota erakunde bat izan daiteke-, ospeak eta erabilitako iturriek ematen diote.

Helburua

Aukeratutako baliabide eta guneek arlo zientifiko eta akademikoetako iturri fidagarri, espezifiko, eguneratu eta aitortuetatik datozen edukiak eta informazioa edukitzea.

Galderak
Argi al dago nor den gunearen arduraduna edo nor diren gunearen arduradunak?
  • Hala badagokio, zehazten al da gunea sustatzen duen erakundearen helburua?
  • Arduradunek -pertsona edo erakunde publikoak, pribatuak, komertzialak, hezkuntzakoak...- ospea al dute jorratutako gaian?
  • Egiazkoa al da gune honetako informazioa?
  • Jaso al du sari edo aitorpenik guneak?
  • Bisita asko edukitzen al ditu?

Eguneratzea

Deskribapena

Eguneratzea hauekin lotuta egon daiteke:

  • Aldian-aldian baliabide berriak gehitzea.
  • Gaiari buruzko ekarpen berriak agertzean direnean, baliabideak eta datuak aldatzea.

Parametro onargarria izaten da gunearen azken eguneratzea kontsulta-data baino hilabete batzuk lehenago bakarrik egin izana, baina zabal daiteke irizpidea kasuaren arabera.

Helburua

Baliozko informazio eguneratua duten guneak eta baliabideak identifikatzea.

Galderak
  • Argi adierazita al dago eguneratze-data?
  • Noiz egin zen azken eguneratzea?
  • Aipamen esplizitu batez gain, ba al dago informazioa eguneratuta dagoela adierazten duen beste ezer?

Nabigagarritasuna

Deskribapena

Erabiltzaileari gunearen barruan kokatzeko eta mugitzeko ematen zaion erraztasuna da. Alderdi hori bereziki garrantzitsua izango da ikasleei webgunean bere kasa nabigatzen utzi behar badiegu.

Helburua

Aukeratzen diren webguneek osagaiak, gaiak, zerbitzuak eta bestelako baliabideak argi eta era antolatuan egituratuta edukitzea, eta erabiltzaileari erraztasunak ematea nabigazio osoan zehar orienta dadin.

Galderak
  • Ba al du gunearen maparik?
  • Azkar identifika al daiteke bisitatu nahi den orria? Erraz eta zuzenean irits al daiteke orrira?
  • Argi adierazita al dago une bakoitzean nabigatzen ari garen orriaren izena?
  • Loturaren bat al du beste orrietatik hasierako orrira?
  • Erraz itzul al gaitezke dagoeneko bisitatu dugun orri batera?
  • Erraz identifika al daitezke loturak?
  • Irizpide argiren bat erabiliz taldekatzen al dira loturak?
  • Ikonoek argi adierazten al dute zertarako diren?

Antolaketa

Deskribapena

Espero da gunea logikoki antolatuta egotea, eta informazio-zati bakoitza gainerakoekin lotuta egotea. Kontuan hartuko da antolaketa-tresnak egotea, adibidez, aurkibideak, eskemak, izenburuak...

Helburua

Aukeratzen diren guneek edukiak eta tresnak era egokian antolatuta aurkeztea, sekuentzia argi eta logiko batekin, eta izenburu, azpiizenburu eta ikonoek funtzio didaktiko gehigarri bat betetzea kontsultarako eta esploraziorako.

Galderak
  • Izenburuak, goiburuak edo kapituluak al ditu?
  • Egokiak dira, edo, alderantziz, gehiegizkoak, ilunak eta nahasgarriak?
  • Adierazitako gaiari buruzko informazioa osaturik al dago?
  • Informazioa logikoki antolatuta al dago?
  • Ba al dago antolatzeko tresnarik (aurkibideak, eskemak...)?

Edukien aukeraketa

Deskribapena

Proposamena da guneko edukiek zaintzea diziplina-eremu edo jakintza-arlo bateko gai, topiko edo teoria bati emandako trataera eta ikuspegia.

Helburua

Identifikatzen diren guneek eta baliabideek baliozko edukiak izatea, sendoak, garrantzitsuak hartzaileen maila eta ezaugarrietarako, eta hizkuntza eta komunikazio idatzia eta grafikoa era egokian erabiltzea.

Galderak
  • Zehatza al da ematen duen informazioa?
  • Argi aurkezten al du informazioa?
  • Garrantzitsua al da informazioa?
  • Koherentzia al dago proposatutako helburuen, edukien eta prozeduren artean?
  • Koherentzia al dago testuaren, irudiaren eta soinuaren artean?
  • Zabaltzen al da informazioa?
  • Sakontasunez landu al da gaia?
  • Informazioa akats gramatikalik eta ortografikorik gabea al da? Modu koherente eta finkoan aurkezten al da guneko orri guztietan zehar?

Irakurgarritasuna

Deskribapena

Irakurgarria izateko, koloreak, tamainak, letra-tipoak, atzealdeak eta ilustrazioak ongi konbinatuta egon behar dute, pantailan irakurri ahal izan dadin, eta era egoki eta erakargarrian nabigatu ahal izan dadin.

Helburua

Identifikatzen diren guneak eta baliabideak erraz irakurri ahal izatea eta nabigatzeko errazak izatea, eta osagai eta baliabide tipografiko eta ikonografikoek balio didaktikoa eta estetikoa gehitzea eskainitako edukiei.

Galderak
  • Egokia al da erabilitako letra-tamaina?
  • Atzealdeko irudiak kontraste ona egiten al du letra-tipoarekin?
  • Testua eta grafikoak pilatuta al daude?
  • Orriak luzeegiak dira edo gehiegi kargatuta daude?

Hartzailearentzat egokia izatea

Deskribapena

Webguneak helburutzat dituen Interneteko erabiltzaileak dira hartzaileak (haurrak, irakasleak, familiak...)

Helburua

Aurkezten den edukia haren hartzailearentzat egokia dela ziurtatzea.

Galderak
  • Haurrentzako gune baten kasuan, informazioa egokia al da garapen kognitiboaren ikuspuntutik?
  • Hiztegia, hizkuntza, kontzeptuak, egokiak al dira aurreikusitako hartzailearentzat?

Irakasleak aukeratutako baliabideak Webquestaren "baliabideak" atalera gehituko dira.

Orain Webquesta idazteko behar den guztia duzu. Gogoan izan jardueraren idazketa guztia ikasleentzat dela, ez dela gelako programazio bat.

4. Jarduera

Ikasleek erabiliko duten Impress programarekin ohitzea

Gida txiki bat dago hemen, Impressekin diapositiba-aurkezpen bat sortzeko; ikasleei zereginean laguntzeko balioko dizue.

Diapositibak sortzea: OpenOfficeren Impress

  • OpenOfficeren multimedia-aurkezpenak egiteko Impress programa ireki. Programen menuko Aurkezpena aukera da.

OpenOffice programa-multzoa ez badaukagu, URL honetatik jaits dezakegu: http://es.openoffice.org/

Instalazio-prozesuan zehar zalantzarik izanez gero, "Windowsen Open Office 2.4 instalatzea" tutorialean ematen diren jarraibide zehatzak jarraitzea gomendatzen dugu: [http://www.educared.net/softwarelibre/tutoriales/pdf/openofficeparawindows.pdf], Educared - Fundación Telefónicak egina.

  • Programa zabaltzean, pantaila bat agertuko zaigu, aurkezpenak sortzeko morroiarekin.

Prestatutako zenbait txantiloi badiren arren, aurkezpen huts batetik abiatzea proposatzen dugu, guk nahi dugun eran moldatzeko. Horretarako, Aurkezpen hutsa aukeratu eta zuzenean klik egingo dugu Sortu botoian.

  • Aurkezpen hutsa aukeratu ondoren, programaren pantaila agertuko zaigu. Han bost atal handi agertzen dira:

  1. aukeren menua,

  2. ekintza ohikoenetarako lasterbide-botoiak,

  3. aurkezpeneko diapositiben koadro txikiak,

  4. lantzen ari garen diapositiba,

  5. zereginen aukerak (lehen pantaila honetan, diapositiben diseinu-txantiloien katalogoa agertzen zaigu).

Txantiloiek diapositiben edizio-lana errazten dute. Diapositiban sartu nahi dugun informazioa kontuan hartuta aukeratuko dugu gure helburuari hobekien egokitzen zaion diseinua.

Automatikoki, pantailaren erdialdeko diapositiban (lantzen ari garenean), edizioari laguntzeko laukia agertuko zaigu, titulua eransteko.

  • Tituluaren laukian klik eginez editatu ahal izango dugu, guk nahi dugun testua sartzeko.
  • Jada badugu diapositiba bat gure aurkezpenean, eta, horrenbestez, fitxategia gordetzeko une egokia da. Horretarako, klik egingo dugu tresna-barran, diskete baten itxura duen ikonoan.

Fitxategiaren izena eta gure ordenagailuan non gorde nahi dugun adierazi beharko dugu.

Impressek automatikoki gordetzen du egiten ari garen lana, baina egokia izaten da egindako lana gordetzen joatea, aurkezpenean aurrera egiten dugun heinean.

Hurrengo urratsa beste diapositiba batzuk sartzea izango da, gure aurkezpenak edukia izan dezan.

Horretarako, nahikoa da tresna-barrako Diapositiba botoian klik egitea.

Automatikoki beste diapositiba bat gehituko da gure aurkezpenean. Lehenespenez, aurrekoaren diseinu berbera izaten du. Dena den, oso erraza da haren itxura aldatzea: pantailaren eskuinaldeko zutabean ditugun proposamenetatik, egokien deritzoguna aukeratu besterik ez dugu egin behar.

Horrela, diapositiba berriak gehituz eta gehitutako elementuen formatua aldatuz, gure aurkezpena osatuko dugu, gure ikasleei azaldu nahi diegun informazioa sartuta.

Gure aurkezpena nola geratzen ari den ikusteko, lehenengo diapositibara joan eta Aurkezpena botoian klik egingo dugu (pantailaren goiburuko tresna-barran dago).

Diapositiba batetik beste batera pasatzeko, klik egingo dugu saguarekin. Aurkezpen-ikuspegitik ateratzeko, ESC teklan klik egingo dugu.

4. Jarduera

Koloreak Impressen

Nola aldatu diapositibaren atzealdeko kolorea eta testuaren kolorea?
  • Formatua menuan Orrialdea aukeratu.
  • Atzeko planoa fitxan Kolorea aukeratu Betegarria laukian. Aukeratu kolorea. Egin klik Onartu aukeran.

Programak galdetzen digu ea atzealdearen kolore hori nahi dugun aurkezpeneko diapositiba guztietarako. Bai edo Ez erantzungo dugu, egokiena deritzoguna.

Esate baterako, beltza aukeratzen badugu eta oso astuna geratzen bada diapositiba guztietan erabiltzeko, Ez aukera markatuko dugu, eta lantzen ari garen diapositiban soilik aplikatuko da aukeratutako atzealdea.

  • Testu-koadroa hautatuko dugu orain. Horretarako, egin klik koadroaren ertzetakoren batean. Beste aukera bat ere badago: kurtsorearen bidez hautatzea testua, testu-prozesagailuetan bezala.

Horren ondoren, klik egingo dugu Letra-tipoaren kolorea botoian (testu-formatuaren tresna-barran dago, pantailaren goiburuan)

4. Jarduera

Impressen irudiak txertatzea

Nola txertatu irudiak diapositiba batean?


  • Pantailako goiburuko Txertatu menuan Irudia aukera hautatuko dugu, eta agertzen zaigun menuan, Fitxategitik aukera.
  • Gure ordenagailuko fitxategien administratzailearen karpetetatik, txertatu nahi dugun irudia aukeratuko dugu, eta berretsi egingo dugu aukeraketa.

Automatikoki, irudia lanean ari garen diapositibaren erdian agertuko da.

  • Irudia txertatu ondoren, txertatutako bi elementuen formatua aldatzeko aukera dugu.

4. Jarduera

Aurkezpena egiteko gomendio batzuk

  • Aurkezpena egiten hasterako, oinarrizko egitura bat pentsatuta edukitzea komeni da.

Impress erabiltzen ari garela, hasierako ideia hori aldatzen joan gaitezke, aurkezpenaren edukia zertzen ari garen heinean, baina hasierako egitura baliagarri izango zaigu abiapuntu gisa.

  • Erabil ditzagun aurkezpenerako programaren aukera grafikoak. Diapositibetan ahalik eta testu gutxien sartu behar dugu: irudiak eta azalpen-grafikoak izango dira protagonistak. Aurkezpenean web-esteka bat sartzea ere pentsa dezakegu (Interneterako konexioa badugu), ikasleei erakutsi nahi diegun orrialdea zuzenean zabaltzeko.

  • Erabili diapositiben informazioa irakurtzen laguntzen duten koloreak, eta ez erabili efektu gehiegi, arreta galaraz dezakete eta.

Gehiago jakin nahi izanez gero...

Impressen tresna gehiago aztertu eta erabiltzen ikasi nahi baduzu, ikusizko tutorialak kontsultatzea gomendatzen dizugu; esaterako, Educared – Fundación Telefónicak eskaintzen duena software libreari buruzko atalean (zenbait bloketan zatituta daude):

http://www.educared.net/softwarelibre/tutoriales/indiceoficina.html

5. Jarduera

Webquesta martxan jartzea, eta hura garatzen eta ebazten laguntzea.

Ikasleei zeregin birtual bat proposatzen dien irakasleak ikasleen autonomian oinarritu behar du proposamena. Laguntzeko zeregina Webquesta garatzeko etapekin lotuta egongo da. Honela laburbil daiteke:

Webquestaren elementua

Irakaslearen zeregina

Sarrera

Gaia aurkeztea, motibazioa piztea

Zeregina

Helburua argitzea, konpondu beharreko arazoa edo erronka azaltzea.

Prozesua

Taldeek rolak banatzen dituztela ziurtatzea; ikasleek beharrezko diren tresnak dituztela ziurtatzea, edo alternatibak bilatzen laguntzea; lana eraginkortasunez hasten laguntzea.

Baliabideak

Arazo teknikoak konpontzea, halakorik balego (adibidez, hiperestekek ez funtzionatzea); tresna birtualak (adibidez, orrien barruko bilatzaileak) erabiltzen zailtasunak dituzten ikasleei laguntzea.

Ebaluazioa

Ebaluazio-matrize baten erabilera argitzea.

Ondorioa

Talde bakoitzaren ondorioekin egiten den azken eztabaida moderatzea.

Irakasleentzako baliabideak eta programak

  • WebQuestaren zereginei buruzko artikulua: http://www.eduteka.org/tema11.php
    Bernie Dodgeren artikulua, Eduteka atariak itzulia; WebQuest batekin egin daitezkeen zereginen kategoriak azaltzen dira bertan. Taxonomia horren bidez, berehala ikus daiteke pantailan Webquest batekin egin daitekeena. Irakurtzea gomendatzen dugu!
  • WebQuest zoragarri bat idazteko bost arau: http://www.eduteka.org/profesor10.php
    Bernie Dodgeren artikulu bat, Edutekak itzulia; norberaren WebQuesta sortzen laguntzen duten bost proposamen egiten dira bertan.
  • Webquesten liburutegi semantikoa: http://cfievalladolid2.net/webquest/common/index.php
    Liburutegi horrek irizpideen araberako (hezkuntza-maila, irakasgaia, egilea, hizkuntza) Webquest-bilatzaile bat du; aukera ematen du adibide berriak gehitzeko, erabileratik datozen ohar semantikoak gehitzeko, interes pedagogikoko beste web-baliabide batzuk bilatzeko eta gordailura gehitzeko; Webquest ebaluatzeko; gogokoenen zerrenda bat egiteko, edota edukiak txertatzeko, beste zerbitzu batzuen artean.
  • ESL. Isabel Pérez Torres: http://www.eduteka.org/webquestlineamientos.php
    Isabel Pérez Torresek egindako eta garatutako gunea; Espainiako Bigarren Hezkuntzako ingeles-irakaslea da bera, Granadako Unibertsitatean doktoratua, doktorego-tesiarekin. Ingelesa atzerriko hizkuntza gisa irakasteko/ikasteko Webquesten diseinua: Hiztegia eta irakurmena lortzeko aplikazioak. Granada: Universidad de Granada editoriala. (Pérez Torres, I. 2006).
  • WebQuestak hainbat formatan. Aro digitaleko estrategia metodologikoak: http://abcep.es/blog/webquest
    Jose E. Córcoles Tenderok (Albaceteko Irakasleen Zentroko IKT aholkularia) egindako web-orria. Gaztela-Mantxako Komunitateen Junta. Espainia.
  • Webquest-sortzailea: http://www.aula21.net/Wqfacil/index.htm
    Webquestei buruzko hainbat lotura, artikulu eta baliabidez gain, nork bere Webquestak erraz eta zuzenean linean egiteko baliabide oso interesgarri bat du. Sortzailea zenbait hizkuntzatan dago. Francisco Muñoz de la Peña Castrillok (Carolina Coronado BHIko irakaslea, Almendralejo, Badajoz) egindako orria.

Ikasgelako programazioa

MAILA

IRAKASGAIA

GAIA

IZENBURUA

IRAUPENA

Lehen Hezkuntzako 5. maila

Ingurunearen ezaguera

Loredun landareak

Loredun landareak: egutegia: natura koloretan urtean zehar.

3-4 saio (3-4 ordu)
UNITATE DIDAKTIKOAREN DESKRIBAPENA

Proposamen didaktiko honekin, ikasleek loredun landareen ezaugarri nagusiak eta ingurunearekin duten harremana ezagutu ahal izango dituzte. Diseinu-proposamen bat duen Webquest gisa aurkezten da proposamena. Ikasleek hiru fase edo "etapa" igaro beharko dituzte guztira, zeregina antolatzetik hasita.

Proposamen didaktiko honen helburua da lankidetza eta talde-lana sustatzea. Horregatik, jarduerak taldean egin behar dira. Bestalde, proposamen honek bi IKT tresna integratzen ditu, natur zientzietako gai bat zenbait ikasketa-estrategiarekin lantzeko.

Komunitatearekin parteka daitekeen landare-egutegi bat da Webquestaren azken emaitza.
CURRICULUM-EDUKIAK
  • Landare baten atalak identifikatzea eta bereiztea.
  • Informazioa bilatzea eta ulertzea.
  • Zenbait iturritatik (zuzenean ikusitakoa, entziklopediak, bideoak...) datorren informazioa antolatzea eta konparatzea.
  • Loredun landare baten bizi-zikloa identifikatzea.
  • Gainerako eskola-komunitatearekin parteka daitekeen landare-egutegi bat egitea.
  • Talde-lana. Berdinen artean elkarlanean aritzeko estrategiak garatzea.
  • Sarean informazioa eta irudiak bilatzea eta aukeratzea.

IKASKETA-HELBURUAK
  • Loredun landare baten ezaugarriak identifikatzea eta ezagutzea.
  • Ingurunearen, urteko zikloaren eta loredun landareen arteko erlazioa ezagutzea.
  • Azalpen-testuak irakurri eta ulertzea, haien egiturari eta esanahi orokorrari erreparatuta.
  • Hiztegi espezifikoa zehaztasunez erabiltzea.
  • IKT tresnak erabiltzen ikastea: Webquest, Impress OpenOffice eta Flickr.

IKT GAITASUN OROKORRAK*

F2. IKTak erabiltzea informazioa bilatzeko, aukeratzeko eta aztertzeko.

F3. IKTak erabiltzea testu-informazioa prozesatzeko.

F5. IKTak erabiltzea multimedia-informazioa prozesatzeko.

A1. Komunikatzea eta lankidetzan jardutea.

A2. Ingurune birtualetan moldatzen jakitea.

A3. Informazioa kudeatzea, sortzea eta baloratzea.

C1. Informazioaren pribatutasunari buruz hausnartzea.

C2. Jabetza intelektuala aintzat hartzea.

*"Eskola 2.0" proposamenean Lehen Hezkuntzako 5. mailako ikasleentzako IKT gaitasunei buruz adierazitakoaren barruko itemak. Lantegi honi erantsitako materialetatik aterata: Irakasleentzako eta ikasleentzako IKTko gaitasun-mapak: http://www.eskola20.org/prestakuntza/gaitasun_mapak.pdf.

Ikasgelako programazioa

1. jarduera. Lan-banaketa

Lehenengo jarduera honetan, webquesta egiteko behar dutenari buruz hausnartu beharko dute ikasleek.

ARLOKO GAITASUN espezifikoak

IKT GAITASUN espezifikoak*

EBALUAZIO-IRIZPIDEAK

Autonomia eta iniziatiba edukitzeko gaitasuna

  • Taldean lan egitea: planifikatzea, elkarrekin egin beharreko lanetan ardurak hartzea.

Hizkuntza-komunikaziorako gaitasuna

  • Hizkuntza erabiltzea ahoz nahiz idatziz komunikatzeko, errealitatea adierazteko, interpretatzeko eta ulertzeko, eta jakintza sortzeko eta komunikatzeko.

  • Ulertuz irakurtzea, eta testuak eta irudiak ulertzen eta haietatik informazioa ateratzen laguntzen diguten inferentziak egitea.

Ikasten ikasteko gaitasuna.

  • Teknikak garatzea arreta jartzeko, kontzentratzeko, oroimenerako, hizkuntzaren ulermenerako eta adierazpenerako, lan intelektualerako, lortzera motibatzeko, talde-lanerako, autoebaluaziorako...

A1.2. Arduraz aritzea kulturak ulertzeko gaitasuna eta tolerantzia garatzen dituzten IKT baliabideak erabiltzen dituzten proiektuetan. (1,3,4).

A1.3. IKT baliabide espezifikoak erabiltzea kideekin eta irakasleekin lankidetzan jarduteko, taldean lan egiteko, kritikoki pentsatzeko eta arazoak konpontzeko.

  • Webquest baten atalak identifikatzen ditu.

  • Talde-lanean parte hartzen du planifikatzean, eta egin beharreko zereginak antolatzen ditu lana gauzatzean, edota hartutako ardurak eta konpromisoak betetzean, proposatutako helburuetatik abiatuta emaitza onak lortzeko.

*"Eskola 2.0" proposamenean Lehen Hezkuntzako 5. mailako ikasleentzako IKT gaitasunei buruz adierazitakoaren barruko itemak. Lantegi honi erantsitako materialetatik aterata : Irakasleentzako eta ikasleentzako IKTko gaitasun-mapak.

Ikasgelako programazioa

2. jarduera. Ikerketa

Behin zeregina ulertutakoan, informazioa biltzeko eta aukeratzeko lanari ekin behar zaio.

ARLOKO GAITASUN espezifikoak

IKT GAITASUN espezifikoak*

EBALUAZIO-IRIZPIDEAK

Zientzia-, teknologia- eta osasun-kulturetako gaitasuna

  • Mundu fisikoko prozesuak ulertzea, eta espazioan eta denboran kokatzea.

  • Elementuak eta prozesuak lotzea.

  • Zuzeneko behaketak egitea, lortu nahi diren helburuak kontuan hartuta.

  • Galderak egitea, beharrezko den informazioa bilatzeko gida gisa.

  • Informazio kuantitatiboa eta kualitatiboa aurkitzea, lortzea, aztertzea eta adieraztea.

Hizkuntza-komunikaziorako gaitasuna

  • Hizkuntza erabiltzea ahoz nahiz idatziz komunikatzeko, errealitatea adierazteko, interpretatzeko eta ulertzeko, eta jakintza sortzeko eta komunikatzeko.

  • Hiztegi espezifikoa zehaztasunez erabiltzea.

  • Azalpenak egitea, norentzat diren kontuan izanda.

  • Ulertuz irakurtzea, eta testuak eta irudiak ulertzen eta haietatik informazioa ateratzen laguntzen diguten inferentziak egitea.

Informazioa tratatzeko gaitasuna eta gaitasun digitala

  • Informazioa lortzea eta lortu nahi ditugun helburuetatik abiatuta ezarritako irizpideekin kudeatzea.

  • Gure azalpenak ulergarri egiteko informazioa erabiltzea, eta egindako galderei erantzutea.

Autonomia eta iniziatiba edukitzeko gaitasuna

  • Taldean lan egitea: planifikatzea, elkarrekin egin beharreko lanetan ardurak hartzea.

Ikasten ikasteko gaitasuna.

  • Teknikak garatzea arreta jartzeko, kontzentratzeko, oroimenerako, hizkuntzaren ulermenerako eta adierazpenerako, lan intelektualerako, lortzera motibatzeko, talde-lanerako, autoebaluaziorako...

F2.1. Interneteko zerbitzuak erabiltzea (web-bilatzaileak eta beste batzuk), informazioa bilatzeko (3,6).

F2.2. Interneteko zerbitzuak eta beste estrategia batzuk erabiltzea, informazioa hautatzeko eta aztertzeko.

A1.3. IKT baliabide espezifikoak erabiltzea kideekin eta irakasleekin lankidetzan jarduteko, taldean lan egiteko, kritikoki pentsatzeko eta arazoak konpontzeko.

A3.2.. Irakasleak proposatutako irizpideak aplikatzea informazio garrantzitsua aukeratzeko.

A5.1. Batez ere irudien eta soinuen bidez, benetako munduko gaiak esploratzeko eta/edo heldu baten laguntzaz benetako arazo errazei heltzeko aukera ematen duten IKT baliabideak erabiltzea.

C2.3. Webean informazioa erabiltzeari dagokionez zer konbentzio dauden jakitea, egileak aitortzeko eta iturriak behar bezala aipatzeko.

  • Metodologia zientifikoetan (behaketa) barneratzeko aukera ematen dioten prozedurak eta trebetasunak ikasten ditu.

  • Talde-lanean parte hartzen du planifikatzean, eta egin beharreko zereginak antolatzen ditu lana gauzatzean, edota hartutako ardurak eta konpromisoak betetzean, proposatutako helburuetatik abiatuta emaitza onak lortzeko.

*"Eskola 2.0" proposamenean Lehen Hezkuntzako 5. mailako ikasleentzako IKT gaitasunei buruz adierazitakoaren barruko itemak. Lantegi honi erantsitako materialetatik aterata : Irakasleentzako eta ikasleentzako IKTko gaitasun-mapak.

Ikasgelako programazioa

3. jarduera. Diseinua

Beharrezko datuekin sormenezko diseinuan aurrera egiten da, OpenOfficeren Impress programaren erabilera gehituta.

ARLOKO GAITASUN espezifikoak

IKT GAITASUN espezifikoak*

EBALUAZIO-IRIZPIDEAK

Hizkuntza-komunikaziorako gaitasuna

  • Hizkuntza erabiltzea ahoz nahiz idatziz komunikatzeko, errealitatea adierazteko, interpretatzeko eta ulertzeko, eta jakintza sortzeko eta komunikatzeko.

  • Hiztegi espezifikoa zehaztasunez erabiltzea.

  • Ahozko nahiz idatzizko hizkuntza ongi erabiltzea zenbait testuingurutan.

  • Azalpenak egitea, norentzat diren kontuan izanda.

Informazioa tratatzeko gaitasuna eta gaitasun digitala

  • Gure azalpenak ulergarri egiteko informazioa erabiltzea, eta egindako galderei erantzutea.

Autonomia eta iniziatiba edukitzeko gaitasuna

  • Taldean lan egitea: planifikatzea, elkarrekin egin beharreko lanetan ardurak hartzea.

F3.1. Testu-prozesamenduko oinarrizko eragiketak egitea (kopiatu eta itsastea, formatua, lerrokatzea, orrialdeak zenbakitzea, irudiak txertatzea, letra-tipoa eta tamaina aldatzea, eta dokumentuak artxibatu eta inprimatzea).

F5.1. Multimedia-edukiekin lotutako oinarrizko eragiketak egitea (kopiatu eta itsastea, formatua, irudi bat, soinua, testua edo bideoa txertatzea; argazki bat webgune batetik deskargatzea) (1, 5).

A4.2. Sormena, ikerketa eta berrikuntza baliatuz, beren produktuak (simulazioak, bideo-jokoak, aurkezpenak, gailuak) sortzeko aukera ematen dieten IKT baliabideak erabiltzea, beren interesak betetzeko edo beste batzuek planteatutako arazoei irtenbidea emateko.
  • Informazioa argi egituratzen du, landare-egutegi bat egiteak ematen dituen aukerak aprobetxatuta.
  • Egutegia egiterakoan, tratamendu eta edizio grafikoko aukerak erabiltzen ditu. Transmititu nahi diren ideiak indartzeko eta haiek ulertzen laguntzeko balio duten irudiak txertatzen ditu.
  • Multimedia-baliabideak zer webetatik atera dituen adierazten du, eta ezarritako protokoloari jarraituz aipatzen ditu (titulua, egilea, URLa eta kontsulta-data), oinarri izan duten informazioa nondik lortu duten azaltzeko.
  • Trebetasunez konbinatzen du multimedia-informazioa: testua, irudiak, bideoak...

     

*"Eskola 2.0" proposamenean Lehen Hezkuntzako 5. mailako ikasleentzako IKT gaitasunei buruz adierazitakoaren barruko itemak. Lantegi honi erantsitako materialetatik aterata : Irakasleentzako eta ikasleentzako IKTko gaitasun-mapak.

Laguntza

Laguntza
  1. Ezkerreko Menua (goitik beherako ordenean): ikastaroaren orrialde nagusiko ikonoa (home), hizki tamainuaren ikonoa, moduluaren inprimakiaren ikonoa, laguntzarako sarbidearen eta edukiaren aurkibidearen ikonoa.
  2. Barra materialen izena eta oraingo atalaren izenburua.
  3. Nabigazio geziak (hurrengo-aurreko orrialdea).
  4. Edukiak.

Egilea:

Pau Casacuberta