3. Ariketa. ADE-a erabili

3. ARIKETA Arbel digital elkarreragilea erabiltzea ahozko azalpenaren euskarri moduan

Aurkezpena prest dugunean, fitxategia prestatuko dugu arbel digitalaren bidez aurkezteko, edo proiektagailuari konektatutako ordenagailuaren bidez aurkezteko. Horretarako, fitxategia pendrive batean kopiatuko dugu, arbelaren edo proiektagailuaren oinarri den ordenagailuan konektatzeko.

Ziurtatu egin beharko da ordenagailu horrek instalatuta duela OpenOffice programa-multzoa, Impress programaren bidez egin dugun aurkezpena ireki eta ikusi ahal izateko. Ikastetxeko arduradun teknikoari galdetu diezaiokegu, eta programa-multzoa ez badugu instalatuta, instalatzeko eska diezaiokegu. Doan da eta erraz deskarga daiteke Interneten bidez.

Arbelak, ongi funtziona dezan, kalibratuta egon behar du (instalatzen den unean kalibratu ohi da). Guk ez dugu ezer egin behar alde horretatik, baina garrantzitsua da jakitea kalibratuta dagoen, gerta badaiteke abian jartzean guk hautatutako aukerak ez aktibatzea edo guk hautatutakoaren ondoko aukeraren bat aktibatzea. Horrelakorik gertatzen bada, arbela ez dago behar bezala kalibratuta, eta aztertu dezaten eskatu behar dugu, jarduera aurkezteko saioan puntu-puntuan egon dadin.

Fitxategia eskuratzeko moduan eta arbela konektatuta eta kalibratuta dagoela, hurrengo urratsa arbelaren funtzionamenduarekin ohitzea da. Arbelaren funtzionamendua aldatu egiten da fabrikatzailea zein den, baina guzti-guztiek sistematika soila izaten dute, finean dimentsioz aldatutako ordenagailuak baitira, haien ohiko ikono intuitiboak dituztenak.

Arbel digitalak lanerako hainbat aukera ematen ditu, eta oso erabilgarriak dira hezkuntza-jarduera asko eta askotarako. Pantaila digital elkarreragilearen bidez, ordenagailua kontrola daiteke, eskuz idatzitako oharrak egin proiektatutako edozein irudiren gainean, eta gorde, inprimatu, posta elektronikoz bidali edo hainbat formatutara esportatu.

Baina arbel digital elkarreragileak badu beste balio erantsi bat ere: aurreko guztiaz gain, proiekzio-azalean zuzenean eragiteko aukera ematen du, erakusle bat edo eskuak erabiliz, eta sagua edo teklatua erabili behar izan gabe. Gainera, zenbait tresna osagarri ere baditu, higikorrak, aurkezpenean eragiteko. Esate baterako: audio- eta bideo-grabagailua, markatzaile grafikoa, "zoom" moduko lupa, teklatu eta kalkulagailu birtuala, eta itzal edo gortina birtuala pantailaren zati bat estaltzeko edo ezkutatzeko.