Arbel digitala erabilita, mapa kontzeptuala proiektatuko dugu, 3 sektoretako tituluek erakutsiko duten oinarrizko egiturarekin.

Ikasleen ekarpenak bideratuko ditugu, harik eta zerrenda bat lortu arte, 3 sektoreetako baten bereizgarri diren jarduerak bilduko dituena. Ikasleek jarduerak adierazten dituzten neurrian, "subtopics" (azpikontzeptuak) gehituko dizkiogu mapa kontzeptualari. Jarduera hori egin bitartean, ordenagailuan kontzeptu-taula osatzeko proposamena egin diezaiekegu ikasleei, XMind programa erabiltzeko ohitura har dezaten.

Komeni da, ideien jasa edo ekarpena amaitzean, eremu semantiko bat izatea, kontzeptu hauek bilduko dituena: nekazaritza, abeltzaintza, eskulangintza, industria, eraikuntza, osasuna, hezkuntza, telebista, merkataritza, garraioa, etab. Kontzeptu bakoitza dagokion sektorean sartuko da.

Egoki baderitzogu, erakutsi dezakegu nola erants daitekeen irudi bat azaltzen diren kontzeptuak argitzeko edo nola erants dezakegun soinu edo hiperestekaren bat haiei buruzko informazioa zabaltzeko.

Lehen ariketa honek lanerako tarte zabala ematen dio lan-taldeari, eta, horrekin batera, aniztasunaren trataera egokia egiten du, jakintza lankidetzaren bidez eraiki eta ikasteko aukera ematen baitu.

Azkenik, mapa kontzeptuala handitu dezakegu laugarren sektorearen gorabidea adierazteko. Adimen-maila handiko zerbitzuak biltzen dira bertan; esaterako, ikerketa, garapena eta berrikuntza.