4. Ariketa. Oihartzunak sortzea

IKASLEEKIN EGINGO DEN LANA: NIRE HERRIKO OIHARTZUNAK SORTZEA (1H)

Lehenik eta behin, Woices zerbitzuko “oihartzun” batzuk entzun behar ditugu gure ikasleekin. Lan hori egitean, zerbitzuaren funtzionamendua ulertuko dute, eta tokatu zaien herriari buruz grabatuko duten “oihartzuna” non azalduko den jakingo dute. Komeni da minutu batzuk ematea ikasleei, mapa ikertu eta haiek aukeratutako "oihartzunak" entzun ditzaten.

Ondoren, zerbitzua deskribatuko duen testu bat idatziko dute ikasleek. Aurreko ariketan bildutako informazioa baliatuko dute idatzi hori egiteko. Testua idaztean, kontuan hartu behar dute ahots goran irakurri eta grabatu behar dela, eta deskribatzen ari diren lekuan daudela pentsatu behar dute. Ahozko erregistroaren arauak bete behar dituzte.

Grabatzen hasi baino lehen, idatzitako paragrafoak errepasatzea komeni da. Ondoren, grabazioa egin bitartean, ikasleak txandakatu egin daitezke taldekide guztiek parte har dezaten "oihartzunean". Ariketa amaitzean, ikaskideek egindako oihartzunak entzungo dituzte. Egokia da nabarmentzea grabazio horren bidez zerbitzu bat ematen zaiola komunitateari, hau da, Woices zerbitzuaren erabiltzaileek osatzen duten komunitateari.

Grabatutako "oihartzun" bakoitzak bere web-helbide edo URL-a izango du. Komeni da oihartzun guztiak erregistratzea, haiek ikastetxeko web-orrian zabaltzeko, edo ikasgelako blogean, sare sozialen batean (haietan parte hartzen badugu), posta elektronikoan, etab.