5. Ariketa. Bidaia-ibilbide bat prestatzea

IKASLEEKIN EGINGO DEN LANA: LEKU INTERESGARRIAK AUKERATU ETA INFORMAZIOA BILATZEA (1h)

Beren herriko leku turistikoei buruzko informazioa bilatu behar dute ikasleek. Aurreko ariketan egin den moduan, lantalde bakoitzari aurrez aukeratutako webgune bat eta erreferentziazko web-orri bat eman diezaiokegu, edo, bestela, ikasleen esku utz dezakegu informazioa bilatu eta hautatzeko lana.

Ikasle-talde bakoitzak ikertuko dituen webgune interesgarriak zehaztu ondoren, irakasleak Googledocs tresnak sortu duen artxibora joko dute, eta han bilduko dute ikasleek bakarka eskuratu duten informazioa. Ondoren, informazio hori erabiliko dute paragrafo bat idazteko, eta aukeratutako webgunean deigarriena egin zaizkien elementuak azalduko dituzte bertan. Googledocs-eko artxibo hori bera erabil dezakete paragrafo hori idazteko, ikasle bakoitzak proposamen bat egin baitezake bere ordenagailutik, eta ikasle bakoitzak gainerakoek idatzitakoak irakurtzeko aukera izango baitu. Ondoren, ikasleak bildu egin daitezke adostutako azken bertsioa egiteko. Inportantea da hizkera errazean idaztea, ahozko erregistroa zainduz, eta haurrek ulertzeko moduko testua izatea. Lan hori egiteko, moldatu egin behar dituzte jatorrizko testuak, eta beren adineko haurrentzat interesgarria izan daitekeena nabarmendu behar dute.

Ikasleei gogorarazi diezaiekegu zer informazio jaso behar den ezinbestean: ordutegiak, bisita-egunak, sarreren prezioa (doakoa ez bada), turismoarentzat erakargarria izatearen arrazoiak, alderdi historikoen aipamen laburra (hala komeni bada), etab.