Notebook-aren oinarrizko eragiketak

Notebook softwarea osatzen duten tresnek hainbat helburu dute.

Alde batetik, hardwarea kudeatzeko tresnak ditu, adibidez, konektatzeko morroia eta arbel digital elkarreragilearen orientatzailea.

Bestetik, tresna mugikorrak ere baditu; ordenagailuko ohiko programen gainean zenbait eragiketa egiteko balio dute tresna horiek, adibidez, oharrak sortzeko eta pantailaren zati bat nabarmentzeko.

Azkenik, badago bereziki hezkuntzan erabiltzeko aplikazio bat ere, eta eduki digital guztiak aurkezteko eta manipulatzeko balio du, hau da, bideoak, irudiak, audio-fitxategiak eta halakoak aurkezteko eta manipulatzeko. Arbel arruntaren antzera erabil dezakegu aplikazioa.

Tutorial honetan Notebookekin egiten diren eragiketa ohikoenetako batzuk azalduko dizkizugu.

Pantaila orientatzea

Notebook instalatu ondoren egin beharko duzun lehenengo ekintzetako bat arbel digital elkarreragilea orientatzea izango da. Arbela orientatzea ezinbestekoa da; izan ere, ez baduzu orientatzen, ordenagailuak ezin du jakin arbeleko zer puntu ari zaren ukitzen. Arbela tokiz mugitzen duzun bakoitzean, edo Notebooken bertsio berri bat instalatzen duzun bakoitzean, arbela orientatu beharko duzu.

Arbela orientatzeko, ireki Notebookeko Centro de Bienvenida (Ongietorri-atala); programa instalatu duzun karpetaren barruan egongo da atal hori. Horren ondoren, hautatu Orientar (Orientatu) aukera:

Orientazio-prozesua arbel digital elkarreragilearen goialdean ezkerrean hasten da. Gurutze batekin adierazita dauden puntuak indarrez zapaldu beharko dituzu arbelean. Segundo gutxitan arbela orientatuta eta erabiltzeko prest egongo da.