Arbel digital ekarreragilea erabiltzeko 15 proposamen. Matematika arloa

Aurkezpena

Hezkuntzan erabiltzeko hainbat eta hainbat aukera ematen dituen tresna teknologikoa da arbel digital elkarreragilea. Baliabide digital guztiak elkartzeaz gain, arbel digital elkarreragileak ikasketa elkarreragileagoa sustatzen du, eta protagonismo handiagoa ematen die ikasleei. Arbel digital elkarreragileari esker, ikasleek lanak aurkez ditzakete, elkarrekin egin ditzakete jarduerak, eta, are gehiago, beren material didaktikoak sor ditzakete.

Notebooken ezaugarri teknikoak eta funtzionamendua jakiteaz gain, garrantzitsua da irakasleek arbel digital elkarreragilea erabiltzeko proposamen batzuk ere ikustea. Orain 15 proposamen aurkeztuko dizkizugu, eta zure eskolak emateko ideiak har ditzakezu proposamen hauetatik. Proposamenak Euskadiko lehen hezkuntzako hirugarren zikloko curriculumean oinarrituta daude.

Matematika

P. 1. Jarduerak denon artean zuzentzea

Ohikoa izaten da eskoletan jarduerak eta etxeko lanak denon artean zuzentzea. Ikasle bat edo gehiago arbelera irteten dira, aurrez banaka egin dituzten jarduerak ebazteko. Gainerako ikasleek, irakaslearen laguntzaz, egindako akatsak zuzendu behar dituzte.

Arbel digital elkarreragilea erabil dezakegu jarduerak denon artean zuzentzeko; horren abantaila da jarduera gorde dezakegula, aurrerago kontsultak egin ahal izateko. Notebook softwareak baditu zenbait tresna jarduera elkarreragileak sortzeko, eta, hartara, errazago zuzentzen dira ariketak.

Demagun, adibidez, zatikiak ordenatzeko jarduera bat dugula. Ikasleek jarduera banaka egiten duten bitartean, irakasleak arbel digital elkarreragilean idatziko ditu zatikiak, eta taula bat sortuko du haiek ordenatzeko. Gero, boluntario batek jarduera egingo du arbelean, eta gainerako ikasleek akatsak zuzendu beharko dituzte. Jarduera amaitzean, irakasleak Notebookeko orria gorde dezake, beste noizbait erabili ahal izateko.