Moodle: LMS librea

LMS bat (Learning Management System edo ikasketa kudeatzeko sistema) hezkuntzan erabiltzeko programatuta dagoen sistema bat da, eta rol desberdinetako erabiltzaileak izan ditzake (kudeatzaileak, irakasleak, ikasleak, bisitariak). LMS baten bidez, ikastaroak sor daitezke, eta ikastaro horiek hainbat eratako edukiak izan ditzakete: testuak, estekak, komunikazio-tresnak, elkarlanean sortutako testuak, webquestak, jarduera elkarreragileak...

Moodle tresna librea da; hau da, erabiltzaileek askatasuna dute hura kopiatzeko, nola programatuta dagoen ikasteko, aldatzeko eta hobekuntzak gizarteari jakinarazteko. Ezaugarri horrek oinarrizko bi ondorio ditu gutxienez:

• Erabiltzaile-komunitate handi bat du plataformak, eta erabiltzaile horiek ez dira produktu itxi baten hartzaile hutsak. Moodleren erabiltzaileek galderak egiten dituzte laguntza-foroetan, beste erabiltzaile batzuen galderei erantzuten diete, eta bertsio berriak hobetzen parte hartzen dute akatsak hautemateko tresna espezifiko baten bidez; tresna horrek lehentasunak bozkatzeko sistema bat du.

• Moodle plataformetan txerta daitezkeen tresna berriak eskaintzen dira etengabe: teknologia berri bat ikusteko moduluak, beste plataforma batzuekin integratzeko aukera, plataformari beste itxura bat emateko gai berriak...