Ibilbidea

Zer egingo dugu?

Ibilbide bat egingo dugu Moodle plataforma batean zehar, plataformaren ezaugarri nagusiak ezagutzeko, eta haren potentzial izugarriaren zati bat ikusteko.

Moodle espezifikoki hezkuntzan erabiltzeko diseinatu den sistema bat da. Urrutiko modalitatean (e-Learning) erabiltzen da nagusiki, baina oso erabilgarria da, halaber, gero eta ohikoagoa den modalitate misto edo erdi presentzialerako (blended learning); lan presentzialari laguntzen dioten online plataformak sortzeko ere erabiltzen da.

Hainbat eratako erabiltzaileak izan ditzake: bisitariak, ikasleak, irakasleak, ikastaroaren sortzaileak edota plataformaren kudeatzaileak.

Irakaslearen rolean hasiko gara lanean, baina ikaslearen rola hartzeko aukera ere izango dugu; hartara, erabiltzaile-mota horien arteko desberdintasunak ikusiko ditugu.

Zer urrats egingo ditugu?

• Hasteko, Moodleri buruzko gauzatxo batzuk ikusiko ditugu; zer den LMS bat, zergatik esaten dugun software libre bat dela, eta zer pedagogia aplika dezakegun plataforma hori erabiliz.

• Horren ondoren, gure ikastaroaren pantailan zehar ibiliko gara, eta ikastaroak izango dituen edukien lehenengo elementuak editatuko ditugu.

• Azkenik, jarduera sinple batzuk sortuko ditugu, eta haiek ebaluatzen ikasiko dugu.

Nola aurkeztuko dizkizuegu materialak?

Zenbait formatu konbinatuko ditugu, kapsula-lantegiko edukiak lantzeko zenbait aukera emateko:

• Material guztiaren bertsio inprimagarria, PDF formatuan.

• Bertsio elektronikoa, WEB formatuan.

• Zenbait ataletan, bideo bidezko tutoriala.