Aurkezpena

Lantegiaren aurkezpena

Lantegiko materialekin lanean hasi aurretik, lantegiari buruzko 5 galdera aztertuko ditugu.

Zer da IKTko Curriculum Jarduera?

Irakasteko eta ikasteko egitura didaktikoa da. Ikasleak curriculum-gaitasunak eta IKT gaitasunak batera eskura ditzan diseinatuta dago. Proposamen honen bidez, irakaslea IKTen alorrean trebatu ahal izango da, lan-metodologia berriak probatu ahal izango ditu ikasleekin gelan, eta bi gaitasun-eremuak ebaluatzeko jarraibideak izango ditu, hau da, ebaluatzeko ea ikasleek curriculumeko edukiak eta helburuak bereganatu dituzten, eta ea teknologiaren, informazioaren eta komunikazioaren alorrekoak (IKTak) bereganatu dituzten.

Zergatik da interesgarria IKTko Curriculum Jarduerarekin lan egitea?

Ikasgaietako curriculuma oso zabala eta luzea delako, eta gelan lanerako denbora gutxiegi edukitzen delako hori guztia zehatz-mehatz lantzeko. IKTak curriculumaren testuinguruaren barruan landu behar direlako. Ikasleek ikastetxean IKT gaitasunak ere eskuratu behar dituztelako, hala eskatzen baitu informazioaren eta ezagutzaren gizarteak, eta, horretarako, aurrez irakaslea trebatu behar delako. Irakasleak adibidetzat balio duten ereduekin lan egin behar duelako aurrez, gero bere proposamenak egin ahal izateko.

Nola antolatuko da lantegi hau?

Helburua da irakasleei prestakuntza-esperientzia bat ematea, "eginez ikasi" printzipio metodologikoan oinarrituta, eta IKTko Curriculum Jarduera baten bidez. IKTak eta haiekin lotutako metodologiak gelan gauzatzeko, behar-beharrezkoa da hezitzaileak aurrez haiekin lan egin izana. Izan ere, esperientziarik ez badu, ezinezkoa da IKTen alorreko prozesu eta jarduerek gelan arrakasta izatea.

Zein dira prestakuntza-proposamenaren nondik norakoak?

Irakasleei IKTko Curriculum Jardueraren proposamen bat aurkeztuko zaie. Hezitzaileak prestatu egin beharko du jarduera aurrez, web 2.0-ko IKT tresnak ezagutu eta erabiliz, gero ikasitakoa gelan ikasleekin aplikatzeko. Hartara, irakasleak, IKTen alorreko gaitasun eta metodologiei buruzko prestakuntza jasotzeaz gain, bere irakaskuntzako testuinguruan aplika dezakeen hezkuntza-produktu bat sortuko du.

Nola hasten da?

Erabiliko ditugun IKT baliabideak ezagutzeko eta haiekin praktikatzeko gogoz.

Beraz, has gaitezen!

IKT Jarduera Kurrikularraren helburua eta egitura

Material honen helburua hauxe da: adibideen bidez azaltzea nola aplika daitezkeen IKTak gelan, curriculum-edukiak ikasteko eta trebetasun digitalak eskuratzeko.

Gure helburua IKTko gaitasunak eskuratzeko lan espezifikoa egitea denez, unitate didaktikorako proposamenean, ikaskuntza-helburuez eta metodologia-jarraibideez gain, bereziki zehaztu dira unitatea burutzeko ikasleek nahiz irakasleek behar dituzten gaitasun digitalak.

Beraz, proposatutako curriculum-unitatea prestatzean eta lantzean, irakasleak trebetasun instrumentalekin, informazio digitalaren edo komunikazio birtualaren (IKT) tratamenduarekin lotutako jakintza eta jardunbideak aplikatu beharko ditu. Eginkizun horretarako jarraibideak eta laguntza ematea da, hain zuzen, tutorial honen helburu nagusia.

Testu ekoizpena: Deskribapena

Ikaslearentzako lan-proposamena

Objektuak edo paisaien, pertsonen edo pinturen irudiak oinarri hartuta, ikasleek deskribapen bat egiteko behar diren elementuak proposatuko dituzte. Ideia-jasa horretan, irakasleak aditzak eta adjektiboak arbelean idatziko ditu, bai eta ikasleek ezagutzen dituzten alderaketak eta metaforak ere.

Irakaslearentzako prestakuntza proposamena

JARDUERAK	EGIN BEHARREKO LANA	Landuko diren IKT GAITASUNAK*	Beharko ditugun IKT BALIABIDEAK ETA MATERIALAK
1. jarduera. Objektuak deskribatzea	1. ARIKETA. Objektuen irudi bilaketa	D1. Ikaskuntza-esperientzia jakin batzuk diseinatu, gauzatu eta ebaluatzea, dagoeneko erabiltzen diren IKT baliabideak erabiliz, ikasleek beren interesen, beren erritmoaren, beren ikasteko moduaren eta beren trebetasunen arabera lan egin dezaten.	Irudiak edo argazkiak formatu digitalean. Arbel digitala (PDI edo proiektagailua eta ordenagailua).
	2. ARIKETA. Aurkezpenak egiteko tresnak: Impress	G7. Multimedia-edukiekin lotutako oinarrizko eragiketak egitea (formatua, irudi bat, soinua, testua edo bideoa txertatzea; argazki bat webgune batetik deskargatzea)	Argazki edo irudi digitalak. Impress programa (Open Office).
2. jarduera. Pertsonak deskribatzea	3. ARIKETA. Taldearen argazkia eta pertsonen deskribapena	D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.	GIMP programa. Argazki-kamera. Arbel digitala (PDI edo proiektagailua eta ordenagailua).
3. jarduera. Paisaiak deskribatzea	4. ARIKETA. Irudi bilaketa Flickr-en	D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea. D14. Informazioa, eta batez ere web-informazioa, bilatu eta aztertzeko estrategiak modelatu eta sustatzen dituzten ikaskuntza-esperientziak diseinatu, gauzatu eta ebaluatzea.	Flickr-en bilatzea. PDI (edo proiektagailua eta ordanagailua).
	5. ARIKETA. Deskribapenaren txertaketa, Copyrightleft erabiliz	G7. Egin dituzten multimedia eduki operazio oinarrizkoa.	Irudi bati testua gehitzea, Copyrightleft erabiliz.

“Irakasleentzako eta ikasleentzako IKTen gaitasun-mapa" proposamenean kokatutako elementuak*. Lantegi honetarako material erantsietatik atera dira.

Egin beharreko lanei buruzko xehetasunak, irakaslearentzako gidan adierazten dira.

Irakasle Gida

Irakaslearen lan-eskema

1. jarduera Objektuak deskribatzea

1. ARIKETA. Objektuei buruzko irudiak bilatzea

2. ARIKETA. Asmakizun bat osatzea diapositiba batzuen bidez

Prestatze-lanak	Irudiak deskargatzea, ebakitzea eta haien tamaina txikitzea.		Diapositiba-aurkezpenak egiteko tresnak: Impress
Ikasleekin egiteko lana		Objektu baten deskribapena egitea, haren irudian oinarrituta (30 min)		Asmakizun baten aurkezpena egitea Impress programa erabiliz (30 min)

2. jarduera Pertsonak deskribatzea Objektuak deskribatzea

3. ARIKETA. Taldearen argazkia eta pertsonen deskribapena

Prestatze-lanak	Taldearen argazki bat sortzea eta GIMP programa erabiliz aldatzea
Ikasleekin egiteko lana		Pertsonen deskribapenen elementuak (30 min)

3. jarduera Paisaiak deskribatzea

4. ARIKETA. Irudiak bilatzea Flickr-en

5. ARIKETA. Deskribapena txertatzea, Copyrightleft programa erabiliz

Prestatze-lanak	Paisaien irudiak bilatzea Flickr-en		Identifikatzeko argibideak prestatzea eta irudian txertatzea.
Ikasleekin egiteko lana		Paisaien deskribapenen elementuak (30 min)		Ikasleei eskatzea paisaiak bilatzeko (Interneteko irudiak edo argazkiak) eta deskribatzeko (30 min)

1 Ariketa. Objektuen irudi bilaketa

Landuko ditugun IKT GAITASUNAK*	Beharko ditugun IKT BALIABIDEAK ETA MATERIALAK
D1. Ikaskuntza-esperientzia jakin batzuk diseinatu, gauzatu eta ebaluatzea, dagoeneko erabiltzen diren IKT baliabideak erabiliz, ikasleek beren interesen, beren erritmoaren, beren ikasteko moduaren eta beren trebetasunen arabera lan egin dezaten.	Irudiak bilatzea Irudi-tratamendurako programa (Infranview edo Gimp)

Jardueraren kontsigna

Objektuen irudiak bilatuko ditugu Interneten, eta gero, objektu horiek deskribatzen ikasiko dugu. Behin deskribapenen zerrendak prestatuta eduki eta gero, geure asmakizunak sortuko ditugu. Ikasleei aurkeztuko dizkiegu arbelean, diapositiben bidez, guk emandako argibideez asmatzen saia daitezen.

Prestatze-lanak: Irudiak deskargatzea eta haien tamaina eta pisua txikitzea

Proposatutako deskribapenak sortzearren, hasteko, Interneten irudiak bilatuko ditugu.

1. urratsa. Irudiak bilatzea

• Interneteko bilatzaileak erabiliz (adibidez, Google), irudiak bila daitezke. Googleren web-orrian, ezkerraldeko goiko aldean, irudiak bilatzea hauta daiteke.

• Behin irudia hautatu ondoren, ordenagailuan gordetzen da, gero aurkezpenean txertatzeko.

• Saguaren eskuineko botoia sakatu eta gero, Guardar imagen como (Gorde irudia honela:) hautatzen da.

• Fitxategien karpeta zabaltzen da, eta, adibidez, Mis imágenes (Nire irudiak) karpetan gordetzen da.

• Komeni da erraz identifikatzeko moduko izena jartzea irudiei.

Horrela, irudiak ordenagailuan gordeta geratzen dira.

2. urratsa. Irudiaren tamaina egiaztatzea

Zenbait programaren bidez (esaterako, Gimp eta Infranview), irudi baten tamaina zehatz daiteke, edo argazki horren zati batzuk ebaki. 300 x 400 tamaina egokia da Impress programan irudi bat txertatzeko. Oro har, irudi baten tamaina berrezartzean, eskalako balio bat soilik aldatu behar da, irudia desitxura ez dadin.

3. urratsa. Fitxategia gordetzea

Aldatutako fitxategia izen beraz gorde daiteke, ordenagailuan irudiak ez bikoizteko.

Ikasleekin egiteko lana: Objektu baten deskribapena egitea, haren irudian oinarrituta (1 h)

Irudiak bilatzeko jardueran ikasleei laguntzeko, aurreko atalean egindako urratsak proposa daitezke. Jarduera amaitzean, ikasle bakoitzak deskribatzeko objektuari dagokion fitxategia izan behar du.

Objektu bat deskribatzean zer elementu hartu behar diren kontuan azalduko du irakasleak. Esaterako:

• Objektuak deskribatzeko, lehenik eta behin, arreta handiz erreparatu behar zaie, haien ezaugarri bereizgarriak identifikatzeko: forma, tamaina, kolorea, eragiten duen sentsazioa.
• Ideia-jasa egitea proposatzen da, ikasleek ezagutzen dituzten ahalik eta adjektibo kalifikatzaile, aditz, alderaketa eta metafora gehien biltzeko. Elementu horiek guztiak zerrenda batean adieraziko dira, ordenatuta.
• Irakasleak arbelean idatziko ditu taldean sortzen diren hitzak.

3 Ariketa. Taldearen argazkia eta pertsonen deskribapena

2.1. jarduera. Taldearen argazkia eta pertsonen deskribapena

Landuko ditugun IKT GAITASUNAK*	Beharko ditugun IKT BALIABIDEAK ETA MATERIALAK
D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.	GIMP programa Argazki-kamera Arbel digitala (PDI edo proiektagailua eta ordenagailua)

Jardueraren kontsigna

Identifika al dezakezu argazkiko neska/mutila? Erabili zure ikaskideak emandako argibideak, nor den jakiteko.

Prestatze-lanak: Taldearen argazkia sortzea eta aldatzea, GIMP programa erabiliz

1. urratsa. Eskaneatu edo egin taldearen argazki bat

• Daukagun sistema eragilearen arabera, USB kablea da kamera, sakelako telefonoa edo eskanerra ordenagailura konektatzeko modua. Behin USB kablea konektatu eta gero, deskargatzeko edo kopiatzeko aukerak ageri dira, eta ordenagailuak ematen dituen jarraibideak bete behar dira, urratsez urrats.
• Irudia gordeko dugu, eta haren tamaina egiaztatuko, 1.1. jardueran adierazitako urratsei jarraiki.

Jarduera hau egiteko, ikasleei proposatuko diegu taldearen argazkiak beraiek egiteko, edo dituzten argazkiak eskaneatzeko.

2. urratsa. Argazkia aldatzea

• GIMP programa instalatzea

• Ireki programa, eta ireki taldearen irudia
• Hona hemen talde-argazki baten adibidea.

• Hautatu bi edo hiru neska/mutil, irudiak desitxuratzeko.

• Egin klik Filtros (Iragazkiak) aukeran. Menu hau zabalduko da:

• Iragazkiekin jolas eta esperimentatu daiteke. Komeni da desitxuratutako irudiak beste izen batzuez gordetzea, jatorrizko argazkia ez galtzeko. Adibidez, hona hemen Distorsiones (Distortsioak) motako iragazkiko remolino y aspiración (zurrunbiloa eta xurgatzea) aukera aplikatuta 1. neskatoan. Eta Artísticos (Artistikoak) motako iragazkiko Cubismo (Kubismoa) aukera erdian dagoen mutilean.

Horrela, taldearen irudiak alda daitezke, ikasleak ikaskideak identifikatzen saia daitezen, ikasleen deskribapenean oinarrituta.

4 Ariketa. Irudi bilaketa Flickr-en

Landuko ditugun IKT GAITASUNAK*	Beharko ditugun IKT BALIABIDEAK ETA MATERIALAK
D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea. D14. Informazioa, eta batez ere web-informazioa, bilatu eta aztertzeko estrategiak modelatu eta sustatzen dituzten ikaskuntza-esperientziak diseinatu, gauzatu eta ebaluatzea.	Flickr-en bilatzailea Arbel digitala (PDI edo proiektagailua eta ordenagailua)

Jardueraren kontsigna

• Paisaiak deskribatzen ikasiko dugu! Bilatu paisaia baten argazkia Flickr-en, deskargatu zure ordenagailura eta, gero, bete paisaiak deskribatzeko jarraibideak.

Prestatze-lana: Paisaien irudiak bilatzea, Flickr-en

1. urratsa. Flickr-en web-orrian sartzea

• Egin klik URL honetan: http://www.flickr.com/

• Pantaila hau ageriko da:

• Buscar (Bilatu) laukian, "paisajes" (paisaiak) jarriko dugu. Hala nahi izanez gero, bilaketa are gehiago zehazteko aukera dago; esate baterako, "paisajes Euskadi" (Euskadiko paisaiak) jar dezakegu, gure inguruko paisaiak aurkitzeko.

2. urratsa. Irudi bat hautatzea

• Leiho bat zabaltzen da, eta bertan, koadro txikien tamaina duten irudiak ageriko dira:

• Hor, aukera dago orrialdeetan nabigatzeko, gustatzen zaigun argazki bat aurkitu arte. Beheko aldean nabigatzeko eta paisaia hautatzeko web-orriak ageri dira.

3. urratsa. Irudia gordetzea

• Behin zer paisaia aukeratu nahi dugun erabaki eta gero, klik egin behar da saguaz haren gainean, irudia jatorrizko tamainan izateko. Hori egitean, elkarrizketa-koadro hau ageriko da:

• Guardar imagen como… (Gorde irudia honela) aukeran klik egin behar da. Aukera horretan, irudia gordetzeko karpeta hautatzen da, eta irudiari izena jartzen zaio, gero aurkitzeko balioko diguna.

Ikasleekin egiteko lana: Paisaia baten deskribapena irudi batean oinarrituta egiteko elementuak (1 h)

• Paisaien irudien bilaketa ikasleekin egitea Flickr-en. Ikasle bakoitzak irudi bat izan behar du. Gero, esan ikasleei aukeratutako paisaia deskribatzeko behar diren elementuen zerrenda egiteko (adibidez, zer motatako paisaia den: mendiak, herri bat, itsasoa, etab.). Elementuak arbel digitalean idatziko dira. Jarduera honetan, ikasleei eskatuko zaie, halaber, irudiek sorrarazitako sentsazioak adierazteko (poza, lasaitasuna, goibeltasuna, beldurra).

5 Ariketa. Deskribapenaren txertaketa, Copyrightleft erabiliz

Landuko ditugun IKT GAITASUNAK*	Beharko ditugun IKT BALIABIDEAK ETA MATERIALAK
G7. Multimedia-edukiekin lotutako oinarrizko eragiketak egitea. D6. Mundu errealeko gaiak esploratzeko eta/edo benetako arazoak konpontzeko aukera ematen duten IKT baliabideak erabiltzea.	Copyrightleft programa

Jardueraren kontsigna

Jada baduzu zure paisaiaren irudia, eta deskribapena egin duzu. Orain, deskribapena argazkian txertatzen ikasiko dugu, zure ikaskideekin konpartitu ahal izan dezazun.

Prestatze-lana: Copyrighthleft instalatzea eta lehen urratsak.

1. urratsa. Copyrightleft programa instalatzea

• Copyrightleft programa irekitzea (programa hori soilik ingelesez edo frantsesez dago, baina oso erraza da, eta frantses edo ingeles asko jakin gabe erabil daiteke). Hona hemen adibide bat, ingelesez:

2. urratsa. Irudia kargatzea

• Open image (Ireki irudia) aukeran klik egitean, ordenagailuko karpeten zerrenda agertzen da. Paisaia duen karpeta hautatuko dugu, eta horren barruan, irudiaren izena.

• Irudi hau ageriko da:

IKT jarduera kurrikularraren ikasgelarako programazioa

MAILA	IRAKASGAIA	GAIA	IZENBURUA	IRAUPENA
LH5	Gaztelania eta literatura	Testuak ekoiztea	Deskribapena	3 saio (4 ordu eta 30 minutu, guztira)

UNITATE DIDAKTIKOAREN DESKRIBAPENA

Ikasleek irudiak bilatuko dituzte Interneten, eta taldeko argazkiak egingo. Lortutako irudiak deskargatuko dira, eta deskribapen batzuk (objektuenak, pertsonenak eta paisaienak) sortzeko oinarritzat erabiliko dira. Irudien tratamendurako programak erabiliko dira, eta horietan, deskribapen baten ezaugarriak identifikatuko. Egindako irudikapenak alderaketak egiteko erabiliko dira, eta izan daitezkeen deskribatze-irizpideak ondorioztatzeko. Deskribapen zehatzak lortzeko behatzaile ona izan behar dela aintzat hartzeko sarrera txikia. Azkenik, unitatearen ebaluazio gisa, lanak besteen aurrean erakusteko proposatuko zaie ikasleei, eta ikasitako kontzeptuak azaltzeko.

CURRICULUM-EDUKIAK	IKASKUNTZA-HELBURUAK	IKTko GAITASUN orokorrak*
Deskribapenaren elementuak Behatzea Hitz egitea eta entzutea Idaztea	Objektuen, pertsonen edo paisaien deskribapenetarako elementuak identifikatzea. Hitzen morfologia identifikatzea. Ortografia-akatsik gabe idaztea Esamoldeak eta esaerak sortzea	A2. Ingurune birtualetan moldatzen jakitea A3. Informazioa kudeatzea, sortzea eta ebaluatzea A4. Sortzaileak izatea eta berritzea A5. Mundu erreala ulertzea, esploratzea eta bertan moldatzen jakitea F2. IKTak erabiltzea informazioa bilatzeko, aukeratzeko eta aztertzeko F5. IKTak erabiltzea multimedia-informazioa prozesatzeko

JARDUEREN deskribapena	ARLOKO GAITASUN espezifikoak	IKTko GAITASUN espezifikoak*	EBALUAZIO-IRIZPIDEAK
1. jarduera – Objektuen deskribapena Ikasleek objektuen irudiak bilatuko dituzte, objektu horiei buruzko asmakizunak sortzeko, ikaskideek erantzun zuzena asma dezaten.	Hizkuntza-gaitasuna Ahozko aginduak eta mezuak, azalpenak, asmakizunak eta abar ulertzen ditu Idatzizko testuak sortzen ditu, eta hori egitean, zentzua duten esaldiak erabiltzen ditu	A2.1 Ingurune birtual bat maneiatzen hastea eta ingurune horietako oinarrizko eragiketak ikasteko gai izatea. A5.1 Batez ere irudien eta soinuen bidez benetako munduko gaiak esploratzeko eta/edo heldu baten laguntzak benetako arazo errazei heltzeko aukera ematen duten IKT baliabideak erabiltzea.	Ezaugarriak behar bezala identifikatzea, objektu bat deskribatzen duen asmakizuna sortzeko. Hizkuntza eta ortografia zuzen erabiltzea. Ordenagailuan fitxategiak behar bezala kudeatzea. Interneten aurkitutako irudiak deskargatzeko prozesua behar bezala egitea. Aurkezpenak sortzeko tresna behar bezala erabiltzea.
2. jarduera – Pertsonak deskribatzea Egin taldearen argazki bat edo eskaneatu jada eginda dagoen bat. Manipulatu argazki horretako irudia, eta gero, sortu irudian identifikatzen ez diren ikasleen deskribapena	Hizkuntza-gaitasuna Ideiak eta gogoetak ahoz adierazten ditu Lexiko egokia du Kultura- eta arte-adierazpenerako gaitasuna Matematikak kultura-adierazpenetan egindako ekarpenen berri izatea. Geometria-erlazioak eta -formak bereiztea arte-ekoizpenetan.	A3.4 Berdinkideei ideiak jakinaraztea, dagokien ezagutza-arloetakoak diren sinbolo-multzo txikia erabiliz. A4.2. Sormena, ikerketa eta berrikuntza baliatuz, beren produktuak (simulazioak, bideo-jokoak, aurkezpenak, gailuak) sortzeko aukera ematen dieten IKT baliabideak erabiltzea, beren interesak betetzeko edo beste batzuek planteatutako arazoei irtenbidea emateko.	Irudien tratamendurako eta edizio grafikorako aukerak erabiltzea pertsonen irudietan. Aurkeztutako ideiak defendatzea, arrazoizko argudioak erabiliz. Talde handian ideiak adieraztea, ondo antolatuta eta ulertzeko moduan.
3. jarduera - Paisaiak deskribatzea. Interneten paisaiak bilatzeko proposatuko zaie ikasleei, edo paisaien argazkiak egiteko. Gero, irudiaren ezaugarri fisikoen nahiz irudiak iradokitzen dituen sentsazioen deskribapena sortu beharko dute.	Ikasten ikasteko gaitasuna Ikaskuntza-prozesuak hitzez adieraztea. Hizkuntza-komunikaziorako gaitasuna Bere burua adieraztea eta matematikako hizkuntza zehaztasunez erabiltzeko ohitura izatea. Gizarte- eta hiritar-gaitasuna Taldean lan egitea, beste ikuspegi batzuk onartzea... Informazioa interpretatzea eta aurkeztea Talde-lanean parte hartzea, eta jarrera positiboa izatea besteen ikuspegia errespetatzeari eta irtenbideak bilatzeari dagokionez.	F2.1 Interneteko zerbitzuak erabiltzea (bilatzaileak eta beste batzuk), informazioa bilatzeko F2.2. Interneteko zerbitzuak eta beste estrategia batzuk erabiltzea, informazioa hautatzeko eta aztertzeko F5.1. Multimedia-edukiekin lotutako oinarrizko eragiketak egitea (formatua, irudi bat, soinua, testua edo bideoa txertatzea; argazki bat webgune batetik deskargatzea)	Produktu jakin bat garatzeko prozedurak igartzea. Informazioa argi eta txukun egituratzea, ordenagailuek ematen dituzten aukerak baliatuz. Lankidetzan aritzea. Beste ikaskideen iritziak errespetatzea eta onartzea.